اسلام آباد۔27اکتوبر (اے پی پی):وفاقی وزیر برائے ماحولیاتی تبدیلی سینیٹر شیری رحمٰن نے کہا کہ پاکستان مصر میں آئندہ کثیرالجہتی کلائمیٹ فورم کوپ-27 میں ماحولیاتی انصاف کا معاملہ اٹھائے گا ۔ بدھ کو وزارت ماحولیاتی تبدیلی میں کوپ-27 کے بارے میں بریفنگ اجلاس سے خطاب کرتے ہوئے انہوں نے کہا کہ ہم پاکستان کی تاریخ کے طویل ترین ریلیف مرحلے کے 20ویں ہفتے میں ہیں۔ اب تک 1,731 افراد جان کی بازی ہار چکے ہیں اور 12,000 سے زیادہ زخمی ہوئے ہیں۔ حکومت نے بی آئی ایس پی پروگرام کے ذریعے 66.6 ارب روپے متاثرہ آبادی کے 2.6 ملین سے زیادہ لوگوں میں تقسیم کیے ہیں۔ سیلاب نے ہمارے لیے تمام ترجیحات کا از سر نو تعین کر دیا ہے اور اس نے آب و ہوا کی وجہ سے ہونے والی تباہیوں کو ایک حقیقت بنا دیا ہے۔
انہوں نے کہا کہ پاکستان نے ہر بین الاقوامی فورم پر اپنا مقدمہ پیش کیا ہے، اس بات کو اجاگر کرتے ہوئے کہ جو کچھ پاکستان میں ہو رہا ہے وہ پاکستان میں نہیں رہے گا، اور ہم کوپ-27 میں بھی ایسا ہی کرنے کا ارادہ رکھتے ہیں۔ انہوں نے کہا کہ وزیراعظم شہباز شریف عالمی رہنماؤں کے اجلاس کے دوران سربراہان مملکت سے خطاب کریں گے، اور وہ ناروے کے وزیر اعظم کے ساتھ ایک اعلیٰ سطحی گول میز کانفرنس کی صدارت بھی کریں گے۔ وزیراعظم دیگر سربراہان مملکت اور وزراء کے ساتھ دو طرفہ ملاقاتیں بھی کریں گے۔
وفاقی وزیر نے کہا کہ پاکستان کا پویلین 25 ضمنی پروگراموں اور پینل مباحثوں کی میزبانی کرے گا جس میں ویڈیوز کی اسکریننگ بھی شامل ہے جس میں موسمیاتی تبدیلی اور حالیہ تباہ کن سیلابوں سے پاکستان کے خطرات کو اجاگر کیا جائے گا۔ انہوں نے کہا کہ کوپ-27 میں پاکستان کا وفد اہم کمیٹیوں میں شرکت کرے گا جن میں کوپ بیورو کی کمیٹی، کمیٹی برائے کلین ڈویلپمنٹ میکانزم، قائمہ کمیٹی برائے خزانہ، کمیٹی برائے موافقت فنڈ، ماہرین کا مشاورتی گروپ، ٹیکنالوجی ایگزیکٹو کمیٹی، وارسا انٹرنیشنل میکانزم اور پیرس معاہدے پر عمل درآمد میں سہولت کی کمیٹی شامل ہے۔
وفد ان کمیٹیوں میں کم اخراج کرنے والی قوموں کے منفرد خطرے کو اجاگر کرے گا اور اس کی وکالت کرے گا۔ انہوں نے کہا کہ گلوبل نارتھ کے ترقی یافتہ ممالک، جن کا کاربن کے اخراج میں سب سے بڑا حصہ ہے، موسمیاتی مالیات اور نقصانات کے جاری مسئلے کو نظر انداز کر رہے ہیں، اور ہم امید کرتے ہیں کہ کوپ-27 میں ان اہم معاملات کو نظر انداز نہیں کیا جائے گا۔
انہوں نے کہا کہ ہم نے بار بار موسمیاتی فنڈنگ بڑھانے کا معاملہ اٹھایا ہے اور 100 بلین ڈالر کا بل کبھی ادا نہیں کیا گیا اور نہ ہی ایڈاپٹیشن فنڈ کی کوئی صورت بنی۔ انہوں نے کہا کہ دوسرے ترقی پذیر ممالک کے تعاون سے پاکستان نقصانات سے متعلق مالیاتی سہولت کے قیام کو ایجنڈے میں شامل کرنے کی کوشش کرے گا۔