پیرس اولمپکس میں آسٹریلیا کو 3میڈلز جتوانے والے میٹ رچرڈسن انگلینڈ ٹیم کا حصہ بن گئے

سڈنی۔19اگست (اے پی پی):پیرس اولمپکس میں 3میڈلز جیتنے والے آسٹریلیا کے میٹ رچرڈسن اپنی نیشنیلٹی تبدیل کرکے انگلینڈ ٹیم کا حصہ بن گئے۔ 25 سالہ رچرڈسن کینٹ میں پیدا ہوئے لیکن 9 سال کی عمر میں ویسٹرن آسٹریلیا منتقل ہوگئے تھے، 16 سال وہاں رہنے کے دوران انہوں نے اپنی دہری شہریت کو برقرار رکھا۔ رچرڈسن برطانیہ کے سائیکلنگ سپرنٹ سکواڈ کا حصہ ہوں گے جس کی کوچنگ سات مرتبہ کے اولمپک گولڈ میڈلسٹ سر جیسن کینی کر رہے ہیں۔

کامن ویلتھ کے دو مرتبہ کے چیمپئن نے سوشل میڈیا پر اپنی پوسٹ میں کہا کہ میرے لئے یہ ایک مشکل فیصلہ تھا، یہ میرا ذاتی فیصلہ ہے جو میں نے اپنے کیریئر اور مستقبل کو دیکھتے ہوئے انتہائی سوچ سمجھ کر کیا۔ انہوں نے کہا کہ میں دل کی گہرائیوں سے آسٹریلیا اور آسٹریلیا سائیکلنگ ٹیم کا احترام کرتا ہوں اور آج جو کچھ ہوں انہی کی مرہون منت ہوں۔