پی ٹی آئی کا آزاد جموں و کشمیر کے انتخابات کے بائیکاٹ کا فیصلہ سیاسی ناپختگی اور غیر مناسب سیاسی رویے کی عکاسی کرتا ہے، رانا ثناء اللہ

اسلام آباد۔4جولائی (اے پی پی):وزیراعظم کے مشیر برائے سیاسی امور رانا ثناء اللہ نے کہا ہے کہ پاکستان تحریک انصاف (پی ٹی آئی) کی قیادت کو سیاسی بلوغت کا مظاہرہ کرتے ہوئے آزاد جموں و کشمیر (اے جے کے) کے انتخابی عمل میں حصہ لینا چاہئے، انتخابات آئین اور قانون کے مطابق مقررہ وقت پر ہی ہوں گے۔ ہفتہ کو نجی ٹی وی سے گفتگو کرتے ہوئے رانا ثناء اللہ نے کہا کہ پی ٹی آئی کا آزاد جموں و کشمیر کے انتخابات کے بائیکاٹ کا فیصلہ سیاسی ناپختگی اور غیر مناسب سیاسی رویے کی عکاسی کرتا ہے۔انہوں نے کہا کہ حالات جیسے بھی ہوں، پی ٹی آئی کو انتخابی عمل میں حصہ لینا چاہیے۔انہوں نے کہا کہ قانونی تقاضے پورے کرتے ہوئے انتخابات مقررہ وقت پر ہوں گے اور ان میں کسی قسم کی تاخیر نہیں کی جائے گی۔ رانا ثنا اللہ نے کہا کہ مختلف حلقوں میں امیدوار بھرپور انداز میں انتخابی میدان میں اتریں گے اور سخت مقابلے کی توقع ہے، کئی حلقوں میں امیدواروں کی تعداد دو ہندسوں تک پہنچنے کا امکان ہے۔ انہوں نے پی ٹی آئی کے مؤقف پر تنقید کرتے ہوئے کہا کہ اگر یہی طرزِ عمل جاری رہا تو یہ امن و استحکام کے مخالف عناصر کے بیانیے سے مطابقت رکھتا ہے، جو کسی صورت قابل قبول نہیں۔ رانا ثناء اللہ نے کہا کہ پاکستان مسلم لیگ (ن) نے ہمیشہ مذاکرات کی حمایت کی ہے اور جمہوری عمل پر یقین رکھا ہے۔ ایک سوال کے جواب میں رانا ثناء اللہ نے کہا کہ پاکستان نے ہمیشہ قربانیوں اور سیاسی حمایت کے ذریعے کشمیریوں کے حقِ خودارادیت کی حمایت کی ہے جبکہ پاکستان کی مسلح افواج بھی کشمیری عوام کی جدوجہد کے ساتھ کھڑی ہیں۔ انہوں نے کہا کہ آزاد جموں و کشمیر اور بھارت کے زیرِ انتظام جموں و کشمیر کے عوام پاکستان سے گہرا تعلق رکھتے ہیں اور وہ بدامنی یا تصادم کے بجائے امن، استحکام اور ترقی کے خواہاں ہیں۔ انہوں نے کہا کہ کشمیر اور پاکستان کا رشتہ گہرا، تاریخی اور مشترکہ جذبات و امنگوں پر مبنی ہے اور دونوں جانب کے عوام امن، استحکام اور باہمی خوشحالی کے حصول کے لیے یکجا ہیں۔