چِلی میں برفانی طوفان کے باعث 5 غیر ملکی سیاح ہلاک

سانتیاگو۔19نومبر (اے پی پی):چِلی کے علاقے پیٹاگونیا میں واقع مشہور ٹوریس ڈیل پائنے نیشنل پارک میں شدید برفانی طوفان کے باعث پانچ غیر ملکی سیاح ہلاک ہوگئے۔شنہوا کے مطابق صدارتی مندوب برائے میگالینس اور چِلیئن انٹارکٹکا ریجن، خوسے انتونیو روئیز کے مطابق ہلاک ہونے والوں میں دو میکسیکن، دو جرمن اور ایک برطانوی خاتون شامل ہیں۔ تمام افراد ایک سیاحتی گروہ کے ہمراہ پارک کی سیر کے لیے آئے تھے۔

انہوں نے بتایا کہ سیاح پارک کے لوس پیروس مقام پر پیدل سفر کے دوران راستہ بھٹک گئے، جو پارک کے داخلی دروازے سے تقریباً 11 کلو میٹر دور ہے۔ لاشوں کو ہیلی کاپٹر کے ذریعے اس علاقے سے نکالا جائے گا جو شدید موسم اور دشوار گزار راستوں کے باعث انتہائی مشکل رسائی رکھتا ہے، اور یہ کارروائی موسم بہتر ہونے پر ہی ممکن ہوگی۔