چین اور شمالی کوریا کے رہنماؤں کا دوستی، تعاون اور باہمی امداد کے معاہدے کی 65ویں سالگرہ پر تہنیتی پیغامات کا تبادلہ

بیجنگ ۔11جولائی (اے پی پی):چین کے صدر اور کمیونسٹ پارٹی آف چائنا کے جنرل سیکریٹری شی جن پنگ اور شمالی کوریا (ڈی پی آر کے) کے سربراہ اور ورکرز پارٹی آف کوریا کے جنرل سیکریٹری کم جونگ اُن نے چین اور شمالی کوریا کے درمیان دوستی، تعاون اور باہمی امداد کے معاہدے پر دستخط کی 65ویں سالگرہ کے موقع پر ایک دوسرے کو تہنیتی پیغامات بھیجے۔

شنہوا کے مطابق صدر شی جن پنگ نے اپنے پیغام میں کہا کہ 1961 میں دونوں ممالک کی سابق قیادت نے اس تاریخی معاہدے پر دستخط کیے، جس نے دونوں عوام کے درمیان دیرینہ دوستی کو مضبوط بنانے کے لیے اہم سیاسی اور قانونی بنیاد فراہم کی۔انہوں نے کہا کہ گزشتہ 65 برسوں کے دوران یہ معاہدہ چین اور شمالی کوریا کے تعلقات کو فروغ دینے اور خطے سمیت عالمی امن و استحکام کے تحفظ میں اہم کردار ادا کرتا رہا ہے۔شی جن پنگ نے کہا کہ دونوں ممالک نے معاہدے کی روح کے مطابق ایک دوسرے کی حمایت، قریبی تعاون اور باہمی اعتماد کو فروغ دیا، جس سے نسل در نسل دوستی، مشترکہ مستقبل اور باہمی تعاون پر مبنی تعلقات مزید مستحکم ہوئے۔انہوں نے جون میں اپنے کامیاب دورۂ شمالی کوریا کا ذکر کرتے ہوئے کہا کہ اس موقع پر کم جونگ اُن کے ساتھ روایتی دوستی کو مزید مضبوط بنانے اور نئے دور کے تقاضوں کے مطابق تعلقات کو وسعت دینے پر اہم اتفاقِ رائے ہوا، جس نے دوطرفہ تعلقات کی آئندہ سمت کے لیے نئی رہنمائی فراہم کی۔چینی صدر نے کہا کہ عالمی صورتحال میں تیزی سے آنے والی تبدیلیوں کے باوجود وہ کم جونگ اُن کے ساتھ مل کر اسٹریٹجک رابطوں کو مزید مضبوط بنانے، دوطرفہ تعلقات کو درست سمت میں آگے بڑھانے اور دونوں ممالک کے عوام کے مفاد میں تعاون کو وسعت دینے کے لیے تیار ہیں، تاکہ خطے میں امن اور ترقی کے فروغ میں مثبت کردار ادا کیا جا سکے۔انہوں نے اس عزم کا اعادہ کیا کہ چین کی حکومت اور کمیونسٹ پارٹی شمالی کوریا کے ساتھ روایتی دوستی کو ہمیشہ اہمیت دیتی رہے گی، کم جونگ اُن کی قیادت میں شمالی کوریا کے سوشلسٹ ترقیاتی عمل کی حمایت جاری رکھے گی اور دونوں ممالک کے مشترکہ مفادات اور سازگار اسٹریٹجک ماحول کے تحفظ کے لیے پرعزم رہے گی۔صدر شی نے اس امید کا اظہار بھی کیا کہ کم جونگ اُن کی قیادت میں شمالی کوریا کی عوام ورکرز پارٹی آف کوریا کی نویں کانگریس کے فیصلوں پر عمل درآمد کرتے ہوئے اپنے سوشلسٹ ترقیاتی سفر میں مزید کامیابیاں حاصل کرے گی۔