کانگو میں مسلح گروہ ایبولا کے خلاف امدادی کارروائیوں میں رکاوٹ بن گئے، اقوام متحدہ

اقوام متحدہ ۔18جون (اے پی پی):اقوام متحدہ نے خبردار کیا ہے کہ جمہوریہ کانگو (ڈی آر سی) کے مشرقی علاقوں میں سرگرم مسلح گروہ ایبولا کے پھیلاؤ کو روکنے کے لیے جاری امدادی اور طبی کارروائیوں میں شدید رکاوٹیں پیدا کر رہے ہیں۔شنہوا کے مطابق اقوام متحدہ کے دفتر برائے رابطہ انسانی امور (اوچا) کے مطابق منگل کے روز صوبہ ایتوری میں ایبولا سے نمٹنے والے پانچ امدادی کارکنوں کو مسلح گروہوں نے مختصر وقت کے لیے حراست میں لیا۔ ایتوری صوبہ ایبولا وبا کا مرکز ہے، جہاں ملک میں رپورٹ ہونے والے 90 فیصد سے زائد مصدقہ کیسز سامنے آئے ہیں۔اوسی ایچ اے نے بتایا کہ جنوبی کیوو صوبے کے متعدد علاقوں میں مسلسل جھڑپوں کے باعث انسانی امداد کی رسائی انتہائی محدود ہو چکی ہے۔

موینگا اور شابونڈا علاقوں میں ہونے والی لڑائی کے نتیجے میں پیر کے روز تقریباً 20 ہزار افراد اپنے گھروں سے نقل مکانی پر مجبور ہوئے۔بے گھر ہونے والے خاندانوں کو خوراک، رہائش، طبی سہولیات، صاف پانی اور تحفظ کی فوری ضرورت ہے۔رپورٹ کے مطابق فیزی علاقے میں بھی مسلح گروہوں کی مسلسل مداخلت کے باعث امدادی سرگرمیاں متاثر ہو رہی ہیں جبکہ امدادی کارکنوں کی سلامتی کو بھی خطرات لاحق ہیں۔اوسی ایچ اے کا کہنا ہے کہ صرف جنوبی کیوو میں رواں سال جنوری سے مئی کے دوران امدادی کارکنوں اور تنظیموں کو متاثر کرنے والے کم از کم 57 واقعات ریکارڈ کیے گئے، جن میں عملے کو دھمکیاں دینا، امدادی سامان کی ترسیل میں رکاوٹ ڈالنا اور نقل و حرکت پر پابندیاں شامل ہیں۔

اقوام متحدہ نے کہا کہ شدید مشکلات کے باوجود ادارہ اور اس کے انسانی ہمدردی کے شراکت دار ایبولا کے پھیلاؤ پر قابو پانے اور متاثرہ افراد تک امداد پہنچانے کے لیے قومی حکام کے ساتھ مل کر کام جاری رکھے ہوئے ہیں۔اوسی ایچ اے نے زور دیا کہ مناسب سیکیورٹی ضمانتوں کے بغیر امدادی کارکن محفوظ طریقے سے اپنی ذمہ داریاں انجام نہیں دے سکتے۔اقوام متحدہ نے تمام فریقین سے مطالبہ کیا ہے کہ شہریوں کے تحفظ کو یقینی بنایا جائے اور ضرورت مند افراد تک محفوظ، فوری اور بلا رکاوٹ انسانی امداد کی رسائی ممکن بنائی جائے۔