کینیڈا اور امریکا میں مبینہ کارروائیاں ،انٹرسیپٹڈ کمیونی کیشنز میں بھارتی حکومت کے ملوث ہونے کے شواہد سامنے آ گئے

اسلام آباد۔17نومبر (اے پی پی):کینیڈا اور امریکا میں بھارتی سرکاری اور حکومتی حکام کی مبینہ مداخلت پر نئے انکشافات سامنے آئے ہیں،انٹرسیپٹڈ کمیونی کیشنز میں بھارتی حکومت کے ملوث ہونے کے شواہد سامنے آ گئے۔تفصیلات کے مطابق ماہرین کا کہنا ہے بھارت کی ریاستی دہشت گردی اب بین الاقوامی سرحدوں کو پار کر چکی ہے۔بھارت میں انتہا پسند ہندوتوا سوچ نے ریاستی اداروں کو زہریلا کر دیا ہے۔مودی اور امت شاہ کی قیادت کے دور میں بھارت ایک غیر ذمہ دار اور جارح ریاست میں تبدیل ہو چکا ہے۔

بھارتی حکومت بیرون ملک مخالف آوازوں کو خاموش کرانے کیلئے خفیہ کارروائیوں میں ملوث پائی گئی۔ کینیڈا میں سکھ رہنما کے قتل اور امریکا میں ناکام حملے کا الزام بھارتی ایجنسیوں پر عائد کیاگیا۔یہ سفارت کاری نہیں، یہ سرحد پار دہشت گردی ہے۔ماہرین کے مطابق بھارت اب اپنے ناقدین اور اقلیتوں کو بیرون ملک بھی نشانہ بنا رہا ہے۔

عالمی برادری کو بھارت کے بڑھتے ہوئے ریاستی تشدد پر فوری نوٹس لینا چاہیے۔پاکستان کے دیرینہ مؤقف کی تصدیق، بھارت کا اصل چہرہ دنیا کے سامنے بے نقاب ہوچکا۔ پہلگام سے لے کر دہلی ، کینیڈا سے لے کر امریکا تک کہانی ایک اور کردار مختلف ہیں ۔ بھارت بین الاقوامی دہشت گردی کی آماجگاہ بن چکا ہے ۔