یورپی یونین نے شام کے ساتھ شراکت داری معاہدے پر آگے بڑھنے کی منظوری دے دی

یورپی یونین کی خارجہ پالیسی کی سربراہ کایا کالاس نے کہا ہے کہ بلاک کے رکن ممالک کے وزرائے خارجہ نے شام کے ساتھ تعلقات کو مضبوط بنانے کے معاہدے پر آگے بڑھنے پر اتفاق کیا ہے جس سے 2008 میں پہلی بار تیار کیے گئے معاہدے کو دوبارہ زندہ کیا جا رہا ہے۔

برسلز ۔17نومبر (اے پی پی):یورپی یونین کی خارجہ پالیسی کی سربراہ کایا کالاس نے کہا ہے کہ بلاک کے رکن ممالک کے وزرائے خارجہ نے شام کے ساتھ تعلقات کو مضبوط بنانے کے معاہدے پر آگے بڑھنے پر اتفاق کیا ہے جس سے 2008 میں پہلی بار تیار کیے گئے معاہدے کو دوبارہ زندہ کیا جا رہا ہے۔العربیہ کے مطابق عام طور پر شراکت داری کا معاہدہ تجارتی روابط کو مضبوط بنانے اور اقتصادی و سیاسی تعاون کو وسعت دینے کی راہ ہموار کرتا ہے۔اجلاس سے قبل یورپی یونین کے سفارتی ادارے کی جانب سے تیار کردہ ایک مباحثاتی دستاویز میں شام کے ساتھ تعلقات کو معمول پر لانے کے لیے بلاک کی اب تک کی سب سے پرعزم کوششوں میں سے ایک کے خدوخال شامل تھے جو بشار الاسد کی برطرفی کے دو سال سے بھی کم عرصے بعد سامنے آئے ہیں۔

اس نے دہائیوں سے جاری آمرانہ حکومت کا خاتمہ کیا اور خطے میں اتحادوں کو نئی شکل دی۔کالاس نے برسلز میں وزرائے خارجہ کے ماہانہ اجلاس کے بعد صحافیوں کو بتایا کہ یورپی یونین شام کے ساتھ اپنے تعلقات میں ایک معیاری تبدیلی کی خواہاں ہے اور وزراء نے آج اس کے ساتھ شراکت داری کے معاہدے پر آگے بڑھنے کے لیے اپنی حمایت کا اظہار کیا ہے۔ کالاس نے ذکر کیا کہ سفارت کار اب اس معاہدے کو حتمی شکل دینے کے لیے تکنیکی اور قانونی تفصیلات پر کام کریں گے جو بلاک اور دمشق کے درمیان آزاد تجارت، سیاسی مذاکرات اور وسیع تر تعاون کے لیے ایک فریم ورک فراہم کرے گا۔تقریباً 14 سال تک جاری رہنے والی خانہ جنگی کے بعد شام کو تعمیر نو کی اشد ضرورت ہے جس نے بنیادی ڈھانچے کو تباہ کر دیا اور معیشت پر بوجھ ڈال دیا ہے۔

ملک کے نئے حکام برسوں کی بین الاقوامی تنہائی کے بعد تعمیر نو اور تجارت کو بحال کرنے کے لیے غیر ملکی سرمایہ کاری کو راغب کرنے کی کوشش کر رہے ہیں۔ کالاس نے کہا کہ ہر کوئی شام کے ساتھ بات چیت کی ضرورت پر متفق تھا کیونکہ اگر ہم ایسا نہیں کریں گے تو دیگر فریق اس خلا کو پر کر دیں گے۔انہوں نے مزید کہا کہ 2008 کے معاہدے کو حتمی شکل ملنے کے بعد اس میں ترامیم پر مذاکرات کا کام شروع ہو جائے گا جس میں انسانی حقوق کی شرائط اور یوکرین کے خلاف جنگ میں دمشق کی جانب سے روس کی سابقہ حمایت جیسے عناصر کو مدنظر رکھا جائے گا۔ شام کی خانہ جنگی میں روسی مداخلت نے اسد کو برسوں تک اقتدار میں رہنے میں مدد دی تھی اور ماسکو کو بحیرہ روم پر ایک سٹریٹجک قدم جمانے کی ضمانت بھی دی۔

لیکن کریملن ان کی برطرفی کے بعد سے موجودہ حکام کے ساتھ ایک نیا معاہدہ کرنے کی کوشش کر رہا ہے تاکہ طرطوس میں بحری تنصیب اور حمیمیم ایئر بیس تک رسائی برقرار رکھی جا سکےجو ایسے دو اثاثے ہیں جو خطے میں روسی فوجی اثر و رسوخ کو مضبوط کرتے ہیں۔یہ فیصلہ یورپی یونین اور شام کے درمیان 1978 میں طے پانے والے تعاون کے معاہدے کی بحالی اور مئی میں بلاک اور دمشق کے درمیان پہلے اعلیٰ سطح کے سیاسی مذاکرات کے انعقاد کے بعد سامنے آیا ہے۔ یورپی یونین نے 2026 اور 2027 کے دوران شام کی مدد کے لیے 620 ملین یورو (718 ملین ڈالر) فراہم کرنے کا عہد کیا ہے جو انسانی امداد اور سماجی و اقتصادی بحالی کے لیے مختص ہیں۔