یوم یکجہتی کشمیر پر ہم پاکستان کی کشمیری عوام کے ساتھ پختہ اور غیر متزلزل یکجہتی کا اعادہ کرتے ہیں، وفاقی وزیر قانون، انصاف و انسانی حقوق کا یوم یکجہتی کشمیر کے موقع پر پیغام

اسلام آباد۔5فروری (اے پی پی):وفاقی وزیر قانون، انصاف اور انسانی حقوق سینیٹر اعظم نذیر تارڑ نے کہا ہے کہ آج(جمعرات کو) یوم یکجہتی کشمیر کے موقع پر ہم پاکستان کی کشمیری عوام کے ساتھ پختہ اور غیر متزلزل یکجہتی کا اعادہ کرتے ہیں اور ان کی آزادی، وقار اور انسانی حقوق کے لیے ان کی جائز جدوجہد میں مکمل حمایت کا اعلان کرتے ہیں۔کشمیری عوام نے دہائیوں سے ظلم و ناانصافی کا سامنا کیا ہے، مگر ان کا حوصلہ اور عزم آج بھی مضبوط اور مستحکم ہے۔

5 فروری کو یوم یکجہتی کشمیر کے موقع پر وزارت انسانی حقوق سے جاری  پیغام میں وفاقی وزیر قانون، انصاف اور انسانی حقوق سینیٹر اعظم نذیر تارڑ نے کہا کہ بھارتی غیر قانونی زیر قبضہ جموں و کشمیر (آئی آئی او جے کے) میں عوام کو بنیادی حقوق سے محروم رکھا گیا ہے اور وہاں وسیع پیمانے پر انسانی حقوق کی سنگین خلاف ورزیاں جاری ہیں، پاکستان ہر بین الاقوامی فورم پر ان کی آواز بلند کرنے، ان کے حالات اجاگر کرنے اور ایک پرامن و منصفانہ حل کے لیے مستقل کوششیں کر رہا ہے۔

انہوں نے کہا کہ حق خود ارادیت ایک ناقابل تنسیخ بنیادی حق ہے جسے اقوام متحدہ اور عالمی برادری نے تسلیم کیا ہے، کوئی ظلم یا جبر کسی قوم کی آزادی کی جائز امنگوں کو ہمیشہ کے لیے دبانے میں کامیاب نہیں ہو سکتا، ہم عالمی برادری سے مطالبہ کرتے ہیں کہ وہ انصاف کے قیام کے لیے اپنا موثر کردار ادا کرے اور مظلوم کشمیری عوام کے دکھوں کے خاتمے کے لیے عملی اقدامات کرے۔آج ہم کشمیری عوام کی قربانیوں کو خراج تحسین پیش کرتے ہیں اور یہ عہد کرتے ہیں کہ پاکستان ہمیشہ، ہر لمحہ اور ہر مرحلے پر کشمیری عوام کے ساتھ کھڑا رہے گا جب تک ان کے حقوق بحال نہیں ہوتے، ان کی آواز عالمی سطح پر نہیں سنی جاتی اور انصاف قائم نہیں ہوتا۔