سرینگر ۔ 14 اپریل (اے پی پی) مقبوضہ کشمیر میں کل جماعتی حریت کانفرنس کے چیئرمین سید علی گیلانی نے شوپیاں میں بھارتی فورسز کے ہاتھوں شہید ہونے والے نوجوانوں عابد احمد اور شاہ جہاں کو شاندار خراج عقیدت پیش کرتے ہوئے قابض فورسزکی طرف سے پرامن مظاہرین کے خلاف طاقت کے وحشیانہ استعمال اور 20 سے زائد افراد کوزخمی کرنے کی شدید مذمت کی ہے۔ کشمیرمیڈیا سروس کے مطابق سید علی گیلانی نے سرینگر میں جاری ایک بیان میں کہاکہ بھارت کی ضد اور ہٹ دھرمی کی وجہ سے جموں وکشمیر میں انسانی جانوں کا زیاں جاری ہے۔ انہوں نے کہاکہ یہاں جو بھی خون خرابہ ہورہا ہے اس کی تمام تر ذمہ داری بھارت کے حکمرانوں پر عائد ہوتی ہے جو مسئلہ کشمیر کو اس کے تاریخی پسِ منظر کی روشنی میں اورجمہوری طریقے سے حل کرنے کے بجائے اسے بندوق اور بارود سے حل کرنا چاہتے ہیں۔حریت چیئرمین نے کہا کہ بھارت نے کشمیریوں کے حقِ آزادی کو جبری طور پر چھین لیا ہے جس کے لیے یہاں کے نوجوانوں عظیم اور بے مثال قربیان پیش کررہے ہیں۔ انہوں نے کہا کہ یہ سرفروش کشمیری قوم کی مظلومیت اور محکومیت ختم کرنے کے لیے اپنی عزیز جانوں کا نذرانہ پیش کررہے ہیں اور ہم پر ذمہ داری ڈالتے ہیں کہ حصولِ مقصد تک جدوجہد کو ہر قیمت پر جاری رکھیں۔ حریت چیئرمین نے کہا کہ بھارت کے جبری قبضے سے آزادی حاصل کرنے کے لیے ہم نے ایک طویل جدوجہد کی ہے اور آج تک 6 لاکھ سے زائد جانوں کی قربانی پیش کی ہے،کوئی گھر یا خاندان نہیں جس کو زخم نہ لگے ہوں اور جس نے قربانیوں میں اپنا حصہ پیش نہ کیا ہو۔انہوں نے واضح کیاکہ انتخابی ڈراموں میں حصہ لینا اور ووٹ ڈالنا نہ صرف ان قربانیوں کے ساتھ غداری اور سودابازی ہے بلکہ اس طرح سے ہم بھارت کے فوجی قبضے کو مضبوط بنانے کے مجرم بن جاتے ہیں، ووٹ ڈال کر ہم اپنے ہاتھوں آنے والے نسل کی گردنوں میں طوقِ غلامی پہناتے ہیں اور ان کے مستقبل کو تاریک بناتے ہیں۔ انہوں نے کہا کہ ہمیں نام نہاد انتخابات کا بائیکاٹ کرکے بھارت کو واضح پیغام دینا ہوگا کہ ہمیں کسی طرح کے انتخابی ڈرامے منظور نہیں بلکہ ہم صرف حقِ خودارادیت کا مطالبہ کرتے ہیں اور یہ مطالبہ پوراہونے تک ہم اپنی جدوجہدہر قیمت پر جاری رکھیں گے۔سید علی گیلانی نے کشمیری عوام بالخصوص نوجوانوں کی قربانیوں کو خراج تحسین پیش کرتے ہوئے کہا کہ ہمارے لوگ تحریک آزادی کے ساتھ والہانہ عقیدت رکھتے ہیں اور ان کے جذبہ آزادی کو دنیا کی کوئی طاقت دبانہیں سکتی۔ حریت چیئرمین نے آزادی پسند عوام بالخصوص نوجوانوں سے اپیل کی کہ وہ ہر موقع پر نظم وضبط کا مظاہرہ کرکے اپنی مقدس تحریک کے خلاف ہونے والی گھناو¿نی سازشوں کا ڈٹ کر مقابلہ کریں اور دشمن کی چالوں سے خبردار رہتے ہوئے تحریک آزادی کو انتشار کی نذر کرنے کے تمام مذموم حربوں کو ناکام بنائیں۔
