صدر پاکستان اکانومی واچ ڈاکٹر مرتضیٰ مغل

اسلام آباد ۔ 10 اگست (اے پی پی) پاکستان اکانومی واچ کے صدر ڈاکٹر مرتضیٰ مغل نے کہا ہے کہ کشمیر کے مسئلے پر بھارت نے بڑی جارحیت کی ہے جس کی اسے بھاری قیمت چکانا پڑے گی،وزیر اعظم عمران خان اس بحران میں قوم کی امنگوں کی درست ترجمانی کر رہے ہیں،ملک بھر کے عوام اورکاروباری برادری حکومت اور فوج کے ساتھ کھڑی ہے اور کسی قسم کی قربانی سے دریغ نہیں کرے گی، ضرورت پڑی تو ہم اپنے فوجی بھائیوں کے شانہ بشانہ لڑیں گے اور جانیں قربان کر یں گے،ہمیں بھارت سے تجارتی یا ثقافتی تعلقات کی کوئی ضرورت نہیں ۔ان خیالات کا اظہار انھوں نے ہفتے کو اپنے ایک بیان میں کیا۔انھوں نے کہا کہ آزمائش کی اس گھڑی میں کشمیریوں کو تنہا نہیں چھوڑا جائے گا،بھارتی مظالم اور کلسٹر بم کشمیریوں کے جذبہ حریت کو دبانے میں ناکام رہیں گے، بندوق کی نوک پر جہاد کے جذبے کو ختم کرنا ناممکن ہے۔ڈاکٹر مرتضیٰ مغل نے کہا کہ بھارت کے مظالم اس حد تک بڑھ گئے ہیں کہ اقوام متحدہ کو بھی اپنی خاموشی توڑنا پڑی ہے اور پہلی باربھارت کو انتہائی واضع پیغام دیا گیا ہے جو پاکستان کی سفارتی فتح ہے۔