کوئٹہ۔16اگست ( اے پی پی )انسداد پولیو کی خصوصی مہم کے آغاز پر وزیراعلیٰ بلوچستان جام کمال خان نے اپنے ایک پیغام میں کہا ہے کہ پولیو مہم کو کامیاب بنا کر صوبے کے صحت مند مستقبل کو یقینی بنایا جا سکتا ہے تاہم پولیو مہم کی کامیابی والدین اور سول سوسائٹی کے تعاون کے بغیر ممکن نہیں۔ وزیراعلیٰ نے کہا ہے کہ گز شتہ چند ماہ کے دوران پولیو کیسسز میں اضافہ باعث تشویش ہے ۔تمام متعلقہ اداروں کو اپنی خامیوں اور کمزوریوں کا جائزہ لیکر انہیں دور کرنا ہوگا۔ انہوں نے ہدایت کی ہے کہ پولیو مہم کے دوران علماء کرام معاشرے کے با اثر حلقوں سیاسی و قبائلی عمائدین کی خدمات بھی حاصل کی جائیں اور پولیو ٹیموں کی تمام علاقوں اور ہر بچے تک رسائی یقینی بنائی جائے ۔وزیراعلیٰ نے کہا ہے کہ ہم نے پولیو جیسے موذی مرض کے خاتمہ کے لئے پختہ قومی عزم کے ساتھ کام کرنا ہو گا ۔ انہوں نے پولیو کے تدارک کے لئے یو نیسف عالمی ادارہ صحت اور ملنڈا گیٹس فاو¿نڈیشن کے تعاون کو سراہتے ہوئے کہا ہے کہ پولیو کو شکست دیکر ہی ہم اپنے بچوں کو ایک محفوظ اور صحت مند مستقبل دے سکتے ہیں۔ وزیراعلیٰ نے کہا ہے کہ والدین اس بات کو سمجھیں کہ پولیو کے دو قطرے انکے بچوں کے لئے کتنے اہم ہیں۔ انہوں نے ہدایت کی کہ ضلعی انتظامیہ پولیو ٹیموں کو ہر ممکن سہولیات اور تحفظ فراہم کریں اور ڈپٹی کمشنرز پولیو مہم کی نگرانی کریں اور پولیو مہم کے مقرر کردہ اہداف کا حصول یقینی بنایا جائے۔
