پاکستان تحریک انصاف کی حکومت نے سی پیک منصوبوں اور خصوصی اقتصادی زونوں پر دو سالہ کارکردگی رپورٹ جاری کر دی

اسلام آباد ۔ 18 اگست (اے پی پی) پاکستان تحریک انصاف کی حکومت نے اپنی حکومت کے صرف دو سالوں میں چین پاکستان اقتصادی راہداری (سی پیک) منصوبوں اور خصوصی اقتصادی زونوں پر تیزی سے کام کیا۔ منگل کو حکومت کی طرف سے منظر عام پر آنے والی دو سالہ کارکردگی رپورٹ کے مطابق وزارت منصوبہ بندی ، ترقی اور خصوصی اقدامات کی جانب سے متعدد نئے اقدامات کیے گئے ہیں۔ صنعتی تعاون کے تحت 2019-20ءمیں اہم پیشرفت ہوئی تھی کیونکہ اس سال علامہ اقبال انڈسٹریل زون کا وزیراعظم نے افتتاح کیا تھا نیز رشکئی زون کے ترقیاتی معاہدے کو رواں سال منظور کیا گیا تھا۔مزید یہ کہ مالی سال2020-21ءکی پہلی سہ ماہی میں رشکئی خصوصی اقتصادی زون کا منصوبہ بنایا جارہا ہے۔دھابیجی زون کو اگست 2020ء تک حتمی شکل دے دی جائے گی۔2020-21ءمیں سی پیک کے تحت تینوں ترجییحی اکنامک زونز میں انفراسٹرکچر کو مرحلہ وار تیار کیا جائے گا اور پبلک سیکٹر ڈویلپمنٹ پروگرام (پی ایس ڈی پی) کے تحت ضروری سہولیات فراہم کی جائیں گی۔ اس کے ساتھ ہی صنعتوں کی منتقلی اور چین اور اس سے باہر کے کاروباری اداروں کو منتقل کرنے کے لئے یہ زون شروع کیے جائیں گے۔ زراعت تعاون کے تحت2020-21ءمیں زراعت میں جدت کے لئے ایک جامع نیشنل ایکشن پلان تیار کیا گیا ہے۔ اس منصوبے میں ٹڈیوں سے نمٹنے ، جرثومہ پلازما ریسورس ایکسچینج ، زراعت کے ماہرین کا تبادلہ ، کیڑوں اور بیماریوں کے قابو پانے والے مصنوعی سیارہ اسٹیشن ، ماہی گیری ، ایکوا کلچر اور کیکڑے زراعت ، فصل کٹائی کے بعد فوڈ پروسیسنگ ٹیکنالوجیز شامل ہیں۔ اسی طرح دیامیر بھاشا ڈیم پر بھی کام شروع کر دیا گیا ہے اور یہ منصوبہ جون 2028 تک مکمل ہوجائے گا۔اس منصوبے کا دائرہ کار 270 میٹر بلند رولر کمپیکٹڈ کنکریٹ ڈیم ، 6.4 ایم اے ایف رواں ذخیرہ اور 4500 میگاواٹ کی توانائی پر مشتمل ہے۔اس منصوبے کے تحت تعمیر کے دوران 16500 روزگار کے مواقع ، 25 لاکھ براہ راست اور بالواسطہ ملازمت اور 18097 جی ڈبلیو ایچ توانائی کے مواقع فراہم ہوں گے۔مہمند ڈیم منصوبہ ہائیڈرو بجلی ، آبپاشی ، سیلاب کنٹرول اور پینے کے پانی کی فراہمی کرے گا۔ اس منصوبے کو قومی اقتصادی کونسل (ایکنک) کی ایگزیکٹو کمیٹی نے اپریل 2018 میں 309.6 ارب روپے کی لاگت سے منظوری دی تھی اور اس منصوبے کا آغاز جولائی 2019 سے ہوا تھا۔ اس منصوبے کے مارچ 2025 ء تک مکمل ہونے کا امکان ہے۔ منصوبے کے تحت 800 میگاواٹ ہائیڈرو بجلی ، 16737 ایکڑ کو سیراب ، سیلاب کنٹرول اور 470 کیوسک پینے کے پانی کی فراہمی ، تعمیر کے دوران 6000 ملازمتیں اور تکمیل کے بعد 1000 ملازمت فراہم کی جائے گی۔ وزارت منصوبہ بندی نے کچھی کینال 2منصوبہ بھی شروع کیا۔ کچھی کنال کا فیز 1 پہلے ہی 80 ارب روپے کی لاگت سے مکمل ہوچکا ہے۔ کنال 7200 ایکڑ ’زرخیز زمین کو آبپاشی کا پانی مہیا کرے گا جس سے فصلوں کی پیداوار 80 فیصد تک بڑھ جائے گی۔کچی کنال کے فیز 2 میں بھی کام شروع کر دیا گیا ہے۔ تکمیل کے بعد دوسرا مرحلہ 216000 ایکڑ اراضی کو سیراب کرے گا اس منصوبے میں یہ صلاحیت موجود ہے کہ وہ نہ صرف اس صوبے کے عوام بلکہ پورے ملک کے عوام کے لئے بھی غذائی ضروریات پوری کرے گا۔ وزارت نے ایم8 موٹر وے پر بھی کام شروع کیا جو سکھر لاڑکانہ کو گوادر سے ملاتی ہے۔ایم 8 دریائے دشت کو عبور کرے گا اور صوبہ بلوچستان میں میرانی ڈیم کے قریب سے گزرے گا۔ایم 8 میں 4-لین اور کل لمبائی 892 کلومیٹر ہوگی۔ M8 موٹروے سی پیک مرکزی روٹ کا حصہ ہے۔