لوگ آئندہ چند روز میں بجلی ، چینی اور گندم کی مصنوعات سے متعلق خوشخبری سنیں گے،وفاقی وزیر برائے منصوبہ بندی و ترقیات

اسلام آباد۔22اکتوبر (اے پی پی):وفاقی وزیر برائے منصوبہ بندی و ترقیات اسد عمر نے کہا کہ لوگ آئندہ چند روز میں بجلی ، چینی اور گندم کی مصنوعات سے متعلق خوشخبری سنیں گے۔انہوں نے جمعرات کو ایک نجی ٹیلی ویژن چینل سے گفتگو کرتے ہوئے کہا کہ پاکستان تحریک انصاف (پی ٹی آئی) حکومت عوام کے مسائل سے بخوبی واقف ہے اور ان کو ریلیف دینے کی ہر ممکن کوشش کی جائے گی۔انہوں نے مزید کہا کہ کورونا وائرس وبائی مرض کی وجہ سے حکومت کو بعض سخت فیصلے کرنا پڑے جس نے دنیا کے متعدد ممالک کی معیشت کو نقصان پہنچایا۔انہوں نے کہا کہ پاکستان کو خطے کے اس حصے میں داخل ہونے والی کورونا وائرس کی دوسری لہر کا سامنا کرنا پڑ سکتا ہے۔انہوں نے عوام سے اپیل کی کہ وہ وائرس پر قابو پانے کے لئے معیاری آپریٹنگ طریقہ کار (ایس او پیز) کو اپنائیں۔ پاکستان ڈیموکریٹک موومنٹ کے بارے میں ایک سوال کے جواب میں ، انہوں نے کہا کہ حکومت کو پی ڈی ایم کی کے جلسوں سے کوئی خطرہ نہیں ہے۔انہوں نے کہا کہ وزیر اعظم عمران خان عوام کی فلاح و بہبود کے لئے "دن رات” کوششیں کر رہے ہیں۔