پشاور ۔3نومبر (اے پی پی):وزیر اعلیٰ خیبر پختونخوا محمود خان سے اسپیکر قومی اسمبلی اسد قیصر نے منگل کو یہاں وزیر اعلیٰ سیکرٹریٹ میں ملاقات کی جس میں کے پی کے میں ترقیاتی سکیموں سمیت باہمی دلچسپی کے امور پر تبادلہ خیال کیاگیا۔ دونوں راہنماؤں کے درمیان صوبے میں جاری میگا ترقیاتی منصوبوں کے معاملات اور ملکی سیاسی صورتحال پر بھی گفتگو ہوئی۔ دریں اثنا وزیر اعلیٰ محمودخان اور اسپیکر اسد قیصر نے صوابی کے ترقیاتی منصوبوں کے حوالے سے اجلاس کی مشترکہ صدارت بھی کی جس میں متعلقہ صوبائی وزراءاور انتظامی سیکرٹریوں نے شرکت کی۔ اجلاس کو ضلع صوابی میں جاری مختلف ترقیاتی منصوبوں کے حوالے سے بریفنگ دیتے ہوئے بتایا گیا کہ ان منصوبوں میں صحت، تعلیم اور بلدیات کے مختلف منصوبے شامل ہیں۔ اجلاس کو ویمن اینڈ چلڈرن ہسپتال کے قیام، باچا خان میڈیکل کمپلیکس میں سہولیات کی فراہمی، بنیادی مرکز صحت زیدہ کی اپگریڈیشن، گدون میں کیٹیگری ڈی ہسپتال کے قیام، ویمن یونیورسٹی صوابی اور دیگر منصوبوں پر پیشرفت پر بھی آگاہ کیا گیا۔ وزیر اعلیٰ نے مذکورہ منصوبوں پر کام کی رفتار کو تیز کرنے اور بعض منصوبوں کی تکمیل کی راہ میں حائل رکاوٹوں کو دور کرنے کے لئے ترجیحی بنیادوں پر اقدامات اٹھانے کی ہدایت کی۔ وزیر اعلیٰ نے کہا کہ عوامی مفاد کے منصوبوں میں تاخیر کسی صورت برداشت نہیں کی جائے گی تمام منصوبوں کو مقررہ ٹائم لائن کے اندر مکمل کیا جائے۔ انہوں نے متعلقہ حکام کو ہدیت کی کہ ان منصوبوں میں غیر ضروری تاخیر کے ذمہ داروں کے خلاف سخت کارروائی ہوگی۔
