اسلام آباد۔23فروری (اے پی پی):وزیرِ اعظم محمد شہباز شریف نے سادگی اور بچت کے حوالہ سے لئے گئے فیصلوں پر بھرپور عملدرآمد کے لئے ایک مانیٹرنگ کمیٹی قائم کرنے کی ہدایت کرتے ہوئے کہا ہے کہ کفایت شعاری اور سادگی کے حوالہ سے جو تاریخ ساز فیصلے لئے گئے ان کے دوررس نتائج برآمد ہوں گے، فیصلوں کو عوام میں پذیرائی ملی ہے، فیصلوں پر نفاذ میں کسی قسم کی تاخیر قابل قبول نہیں ہو گی اور ان کا سختی سے نفاذ ہو گا۔ ان خیالات کا اظہار انہوں نے جمعرات کو حکومتی سطح پر کفایت شعاری اور سادگی کی پالیسی کے نفاذ کے حوالہ سے ایک اہم اجلاس کی صدارت کرتے ہوئے کیا ۔
اجلاس کے شرکاء سے گفتگو کرتے ہوئے وزیراعظم نے کہا کہ وفاقی کابینہ کے گزشتہ اجلاس میں کفایت شعاری اور سادگی کے حوالے سے جو تاریخ ساز فیصلے لئے گئے ان کے دور رس نتائج برآمد ہوں گے، ان فیصلوں پر عملدرآمد سے قومی خزانے کی بچت ہو گی۔ وزیراعظم نے کہا کہ ان فیصلوں کو عوام میں بے حد پذیرائی ملی ہے تاہم مؤثر نتائج کا انحصار اقدامات پر بھرپور عملدرآمد میں ہے۔
وزیراعظم نے سادگی اور بچت کے حوالے سے لئے گئے فیصلوں پر بھرپور عملدرآمد کے لئے ایک مانیٹرنگ کمیٹی قائم کرنے کی ہدایت کی جس میں ہر اتحادی جماعت کے کابینہ رکن کی نمائندگی ہو گی۔ انہوں نے تاکید کی کہ مذکورہ فیصلوں پر نفاذ میں کسی قسم کی تاخیر قابل قبول نہیں ہو گی اور ان کا نفاذ سختی سے ہو گا۔مذکورہ کمیٹی کے اجلاس کی صدارت کا موقع کمیٹی میں موجود ہر اتحادی پارٹی کے کابینہ رکن کو دیا جائے گا ۔
کمیٹی کے دیگر ممبران میں وزیراعظم کے معاون خصوصی محمد جہانزیب خان ، وزیراعظم کے پرنسپل سیکرٹری اور وفاقی سیکرٹری خزانہ شامل ہوں گے۔ وزیراعظم نے مزید ہدایت کی کہ اس کمیٹی کا اجلاس ایک مہینے میں کم از کم دو دفعہ منعقد کیا جائے۔اجلاس میں وفاقی وزیر تعلیم رانا تنویر حسین، وفاقی وزیر قومی غذائی تحفظ طارق بشیر چیمہ، وزیراعظم کے مشیر برائے امور کشمیر و گلگت بلتستان قمر زمان کائرہ ، وزیر مملکت برائے پاور ڈویژن ہاشم نوتیزئی، وزیراعظم کے معاون خصوصی جہانزیب خان اور متعلقہ اعلیٰ سرکاری افسران نے شرکت کی۔
Short Link: https://urdu.app.com.pk/urdu/?p=352756
