تاریخی دن 5فروری کو تمام جماعتوں ،تنظیموں اور مکاتب فکر کو مقبوضہ کشمیر کے ساتھ مکمل اتحاد ویکجہتی کااظہاراوران کی سیاسی واخلاقی حمایت کا اعادہ کرنا ہے، وزیراعظم آزادکشمیر راجہ محمد فاروق حیدر خان
اسلام آباد/مظفر آباد ۔ 02 فروری (اے پی پی) وزیراعظم آزادکشمیر راجہ محمد فاروق حیدر خان نے کہا کہ 5فروری کے تاریخی دن کے موقع پر تمام جماعتوں وتنظیموں اور مکاتب فکر کو مقبوضہ کشمیر کے عوام کے ساتھ کامل اور مکمل اتحاد ویکجہتی کااظہار کرتے ہوئے ان کی سیاسی اور اخلاقی حمایت کا اعادہ کرنا ہے۔ وہ یہاں کشمیر ہاﺅس میں آزادجموں وکشمیر قانون ساز اسمبلی کے ڈپٹی سپیکر سردار فاروق طاہر،وزیر تعلیم بیرسٹر افتخار گیلانی، ممبر اسمبلی راجہ عبدالقیوم خان،چوہدری رخسار احمد،مسلم لیگ ن آزادکشمیر کے نائب صدر سردار ابرار عباسی اور دیگر مسلم لیگی رہنماﺅں سردار ارشد نیازی ،سردار مظہر الیاس، سردار نوید صادق، مرزا آصف مغل ،سردار زاہد عزیز اور دیگر مسلم لیگی رہنماﺅں وکارکنوں اور یوتھ کے نمائندوں سے الگ الگ ملاقاتوں کے دوران ان سے بات چیت کررہے تھے۔ انہوں نے اس موقع پر مسلم لیگی رہنماﺅں وعہدیداروں ،کارکنوں اور یوتھ کے نوجوانوں پر زور دیا کہ وہ 5فروری کے یوم اظہار یک جہتی کشمیر کے مظاہروں اور تقریبات میں اپنی بھرپور شرکت کو یقینی بنائیں۔
