پیرس۔16نومبر (اے پی پی):پاکستان کو 2023 سے 2027 تک کی مدت کے لیے ایک بار پھر یونیسکو کے ایگزیکٹو بورڈ کا رکن منتخب کر لیا گیا۔
فرانس میں یونیسکو میں پاکستان کے مستقل مندوب نے بیان میں بتایا کہ پاکستان نے اکثریت میں ووٹ حاصل کیے۔ بیان میں پاکستان کی حمایت اور اعتماد کے لیے رکن ممالک کاشکریہ ادا کیا گیا۔ بیان میں کہا گیا کہ پاکستان مشترکہ مقاصد کو فروغ دینے کے لیے تمام رکن ممالک کے ساتھ مل کر کام کرتا رہے گا۔ بیان میں کہا گیا کہ ایگزیکٹو بورڈ میں خدمات انجام دینے کی ذمہ داری سونپی جانا پاکستان کے لیے انتہائی فخر کا باعث ہے۔
بیان میں کہا گیا کہ پاکستان پالیسی سازی، اصولوں کی ترقی ،عالمی ترجیحات کو فروغ دینے اور تنظیم کے پروگراموں اور سرگرمیوں کی موثر نگرانی میں اپنا حصہ ڈالنے کے لیے اس موقع سے فائدہ اٹھائے گا۔ بیان میں اس بات پر زور دیا گیا کہ پاکستان بنی نوع انسان کی فکری اور اخلاقی یکجہتی ،تعلیم، سائنس، ثقافت اور مواصلات کے ذریعے عالمی امن اور ترقی کو فروغ دینے کے لیے ایک عالمی فورم کے طور پر یونیسکو کے اہم کردار کی ہمیشہ قدر کرتا ہے
۔بیان میں کہا گیا کہ کثیر جہتی کے حامی کے طور پر پاکستان دنیا کے مختلف خطوں کے درمیان فاصلے کم کرنے اور ٹھوس اور حقیقی نتائج کے حصول کے لئے بنیادی امور پر اتفاق رائے پیدا کرنے کی کوششیں جاری رکھے گا۔ بیان میں اس بات پر روشنی ڈالی گئی کہ ایک شراکت دار کے طور پر پاکستان ایس آئی ڈی ایس آپریشنل حکمت عملی اور عالمی ترجیحات۔ افریقہ اور صنفی مساوات کے لیے فعال تعاون جاری رکھے گا۔ بیان میں کہا گیا کہ پاکستان کا یونیسکو کے ایگزیکٹو بورڈ کے رکن کی حیثیت سے دوبارہ انتخاب اقوام متحدہ کی حمایت اور اس جیسے عالمی فورم پر اس کے تعمیری کردار کا ثبوت ہے
