اسلام آباد ۔ 29 مارچ (اے پی پی)وزیر مملکت برائے اطلاعات‘نشریات و قومی ورثہ مریم اورنگزیب نے عمران خان کے گھر میں پی ٹی آ ئی رہنما کی جانب سے میڈیا کے نمائندے سے بدسلوکی کے واقعہ کی مذمت کرتے ہوئے کہا ہے کہ جب خان صاحب آپ سے سوال کیا جائے توآپ آئینی اداروں کی تضحیک شروع کر دیتے ہیں اور آج جب میڈیا کے نمائندے نے آپ کے قبضہ گروپ سے سوال کیا تو میڈیا کے نمائندوں کی تضحیک افسوس ناک ہے۔بدھ کو اپنے بیان میں وزیر مملکت مریم اورنگزیب نے کہا کہ عمران خان صاحب آپ سے کوئی سوال کرے آپ رونا شروع کر دیتے ہیں ‘ لوگوں کی زمینوں پر قبضے کے سوال کا جواب دیں ‘اگر چوری نہیں کی تو تلاشی دیں ۔انہوں نے کہا کہ عمران خان ایک دفعہ پھر توہین عدالت کے مرتکب ہوئے ہیں ‘عمران خان صاحب نے آج پھر عدلیہ کو متنازع بنانے کی مزموم کوشش کی ہے ۔انہوں نے کہا کہ عمران خان صاحب نے ساڑھے تین سال فسادی اور منفی سیاست کا سہارہ لیا اور اب ڈیڑھ سال آپ کی قسمت میں رونا ہے ‘2018 میں رونے سے کام نہیں چلے گا عوام کو جواب دینا ہو گا۔انہوں نے کہا کہ عمران خان صاحب قوم منتظر ہے کہ کبھی آپ کے پی کے کے لوگوں کے لئے کسی پراجیکٹ پر پریس کانفرنس کریں۔
Short Link: https://urdu.app.com.pk/urdu/?p=48393
