سمبڑیال۔ 17 اکتوبر (اے پی پی):اسسٹنٹ ڈائریکٹر محکمہ زراعت (توسیع) سمبڑیال ڈاکٹر افتخار احمد وڑائچ نے کہا ہے کہ سموگ کے پیش نظر دھان کی فصل کی باقیات کو ہر گز آگ نہ لگائیں اور قانونی کارروائی سے بچیں۔ انہوں نے آج جمعرات کو جاری ایک پیغام میں کہا ہے کہ تمام کاشتکار نوٹ کر لیں کہ لاہود ہائی کورٹ کے احکامات کی روشنی میں حکومت پنجاب نے باقیات کو جلانے کا 15 ہزار روپے فی ایکڑ جرمانہ کی حد مقرر کر رکھی ہے اور جتنے ایکڑ جلائے جائیں گے اسی حساب سے جرمانہ عائد کیا جائے گا۔
انہوں نے کہا کہ کاشتکار کسی قسم کی غلط فہمی میں نہ رہیں کہ اس کی جلائی گئی باقیات اداروں کی نظروں سے اوجھل رہے گی کیونکہ سیٹلائٹ جلائے گئے رقبہ کی نشاندہی کرے گا، لہذا تمام کاشتکار دھان کی فصل کی باقیات کو ہر گز آگ لگانے سے باز رہیں اور ماحول کو آلودہ ہونے سے بچائیں ۔انہوں نے کہا کہ باقیات کو زمین میں تلف کرکے اپنی اور اپنے جانوروں کی صحت کا خیال رکھیں اور زمین کی زرخیزی کو بڑھائیں۔
Short Link: https://urdu.app.com.pk/urdu/?p=513945
