فیصل آباد ۔ 05 نومبر (اے پی پی):محکمہ لائیو سٹاک و ڈیری ڈویلپمنٹ نے گوشت و دودھ کی پیداوار میں اضافے کےلئے خصوصی اقدامات کا آغاز کر تے ہوئے کہا ہے کہ لائیو سٹاک زراعت کا اہم حصہ ہے جس کا مجموعی قومی پیداوار میں شیئر 11.4فیصد ہے ، اگر مویشیوں کی بہتر نگہداشت کی جائے تو ان کا وزن 120روز کے اندر اندر 210سے 260کلو گرام تک بڑھایا جا سکتا ہے ،کٹڑوں اور بچھڑوں کو گوشت کےلئے فربہ کرنا زرعی صنعت سے وابستہ اہم منصوبہ ہے۔
ان خیالات کا اظہار ایڈیشنل ڈائریکٹر لائیو سٹاک و ڈیری ڈویلپمنٹ فیصل آباد ڈاکٹرقیصرخلیق نے ایک بیان میں کیا۔انہوں نے کہا کہ اس وقت پنجاب کی 30سے 35ملین آبادی لائیو سٹاک سے منسلک اور گھریلو سطح پر اوسطاً 2سے 3بھینسیں، ایک سے 2گائے اور 5سے 6بکریاں لازمی پالتے ہیں جس سے ان کو اپنی اصل آمدنی کا 35سے 40فیصد حاصل ہوتا ہے۔ ان کا کہنا تھا کہ حکومت زرعی اجناس اور پھلوں کے بعد گوشت اور دودھ کی پیداوار میں اضافے کےلئے بھر پور وسائل بروئے کار لا رہی ہے۔انہوں نے کہا کہ محکمہ لائیو سٹاک کا دودھ اور گوشت کی زیادہ پیداوار کےلئے خصوصی طور پر تیار کردہ انمول ونڈہ لحمیات کے علاوہ قابل ہضم اجزا اور نمکیات سے بھر پور ہے،یہ ونڈہ پھل، بنولہ، چوکر،روٹی کے ٹکڑوں اور آٹے سے کہیں سستا، معیاری اور زود ہضم ہے۔
ڈاکٹرقیصرخلیق نے کہا کہ مویشی پال خواتین و حضرات انمول ونڈہ استعمال کرکے اپنی آمدنی میں اضافہ کر سکتے ہیں۔انہوں نے کہا کہ ماہرین لائیو سٹاک اور محکمے کے افسران و اہلکار ہمہ وقت مویشی پال حضرات کی رہنمائی کےلئے کوشاں ہیں اس لئے کسی بھی ضرورت کے وقت ان سے رابطہ کیا جا سکتا ہے۔ان کا کہنا تھا کہ محکمے کے کئی مراکز بشمول لائیو سٹاک تجرباتی فارم اور دیگر لائیو سٹاک تجرباتی فارمز و اینیمل نیوٹریشن سنٹر ز پر انمول ونڈے کی بھاری مقدار فراہم کر دی گئی ہے ، بکریوں کی افزائش نسل کےلئے بھی شعور و آگاہی مہم کا آغاز کر دیا گیا ہے تاکہ نہ صرف ملکی گوشت و دودھ کی ضروریات پوری کی جا سکیں بلکہ اضافی گوشت، دودھ اور اس سے تیار ہونے والی دیگر مصنوعات کی برآمد میں بھی اضافے سے قیمتی زر مبادلہ کا حصول ممکن بنایا جا سکے۔انہوں نے کہا کہ مویشی پال حضرات اپنے جانوروں کو مختلف قسم کی بیماریوں سے بچانے کےلئے قریبی ویٹرنری ہسپتال یا ویٹرنری ڈسپنسریز سے رابطہ کر کے ویکسی نیشن کروائیں، ا س ضمن میں محکمہ لائیو سٹاک کی موبائل موٹر سائیکل سروس سے بھی استفادہ کیا جا سکتا ہے۔
Short Link: https://urdu.app.com.pk/urdu/?p=521265
