فیصل آباد۔ 04 دسمبر (اے پی پی):محکمہ زراعت نے کاشتکاروں کو ادرک کی برداشت کسی یا کھرپے کی مدد سے احتیاط سے کرنے اور گٹھلیوں کو زخمی ہونے سے بچانے کے لئے خصوصی اقدامات کرنے کی ہدایت کی ہے۔ محکمہ زراعت توسیع فیصل آباد کے اسسٹنٹ ڈائریکٹرڈاکٹرخالد اقبال نے کہاہے کہ ادرک کے کاشتکارفصل کی برداشت بروقت مکمل کریں اور دسمبر کے آخری ایام میں جب ادرک کے پتے سوکھ جائیں اور ٹہنیاں نیچے گر پڑیں تو سمجھ لینا چاہیے کہ فصل برداشت کے لئے تیار ہے اور اس کی برداشت میں تاخیرسے گریز کرناچاہیے۔
انہوں نے کہاکہ فصل کی برداشت کسی یا کھرپے کی مدد سے احتیاط سے کرنی چاہیے تاکہ گٹھلیاں زخمی نہ ہوں کیونکہ زخمی گٹھلیاں سٹوریج کے دوران بہت جلد خراب ہو جاتی ہیں جس سے منڈیوں میں اس کی اچھی قیمت نہیں ملتی اور کاشتکاروں و سبزی فروشوں کو بھاری مالی نقصان کاسامنا کرناپڑتا ہے۔ انہوں نے بتایاکہ اگر اگلی فصل لگانے کے لئے بیج تیار کرنا ہو تو فصل کی برداشت فروری میں بھی کی جا سکتی ہے۔
انہوں نے بتایاکہ اس دوران اس بات کا خاص خیال رکھنا چاہیے کہ بارش کی صورت میں پانی زیادہ دیر کھیت میں کھڑا نہ رہے کیونکہ کھیت میں پانی کھڑاہونے سے ادرک کی گٹھلیاں زمین کے اندر ہی گل سڑ جاتی ہیں۔ انہوں نے کہاکہ دوسری صورت میں دسمبر کے آخر میں فصل کی برداشت شروع کر کے آئندہ فصل کے لئے صاف ستھری گٹھلیوں کو بھی ذخیرہ کیاجاسکتاہے۔
Short Link: https://urdu.app.com.pk/urdu/?p=531997
