فیصل آباد۔ 05 دسمبر (اے پی پی):پاکستان کی معیشت کا زیادہ تر انحصار زراعت پر ہے اور زراعت میں لائیوسٹاک کاحصہ 55فیصد ہے جبکہ جانوروں کی خوراک کا سب سے بڑا ذریعہ سبز چارہ ہے اس لئے چارہ کی معیاری اقسام کی وافر مقدار میں دستیابی یقینی بنانے کیلئے ہرممکن اقدامات کئے جارہے ہیں۔
ڈائریکٹر زراعت توسیع فیصل آباد نے کہا کہ چارہ جات میں کمی کی بنیادی وجوہات میں کسانوں کی سبز چارہ کی ترقی دادہ اقسام کے بیج اور جدید پیداواری ٹیکنالوجی سے عدم واقفیت ہے حالانکہ ہم جدید زرعی ٹیکنالوجی اپنا کر چارہ جات کی پیداوار میں دیگر ممالک کی طرح خاطر خواہ اضافہ کرسکتے ہیں۔
انہوں نے کہا کہ تجربات سے ثابت ہے کہ اگر ہم زمین کا صحیح انتخاب وتیاری، اچھا بیج، مناسب اور متناسب کھادوں کا استعمال، بروقت کاشت، برداشت ودیگر زرعی عوامل اور ماہرین کی سفارشات پر عمل کریں تو چارہ جات کی فی ایکڑ پیداوار میں نمایاں اضافہ کرسکتے ہیں۔
انہوں نے مزید کہا کہ چارہ جات کی فی ایکڑ پیداوار میں کمی کی وجہ نئی اقسام کا بیج اور جدید فنی مہارتوں کو بروئے کار نہ لانا ہے۔ انہوں نے کہا کہ وقت کی ضر ورت ہے کہ ہم ایسی منصوبہ بندی کریں جس سے چارہ جات کی فی ایکڑ پیداوار میں خاطر خواہ اضافہ ہوسکے۔
انہوں نے بتایا کہ تحقیقاتی ادارہ دالیں مونگ اور ماش کی ایسی نئی اقسام وضع کرنے پربھی کام کررہاہے جو زیادہ پیداوری صلاحیت کے علاوہ خشک سالی کا بھی بہتر مقابلہ کرسکیں۔ انہوں نے دالوں کی زیادہ پیداوارکے حصول کیلئے جڑی بوٹیوں کی تلفی اور کھادوں کے بروقت استعمال بارے کاشتکاروں کو آگاہی فراہم کرنے کی ضرورت پر بھی زور دیا تاکہ کاشتکاردالوں کی جدید ٹیکنالوجی کے استعمال سے دالوں کی پیداوار میں خود کفالت حاصل کرسکیں جس سے دالوں کی درآمد پر خرچ ہونے والے کثیر زرمبادلہ کی بچت ہوگی۔
Short Link: https://urdu.app.com.pk/urdu/?p=532303
