فیصل آباد۔ 05 دسمبر (اے پی پی):سن فلاورکی بمپر کراپ کے حصو ل کیلئے ہائبرڈ اقسام ہائی سن 33، ہائی سن 39، این کے 278، ایف ایچ 331، ڈی کے 4040، جی 101، 64-A-93 وغیرہ کو موزوں ترین قرار دے دیاگیا ہے اور کہاگیاہے کہ کاشتکار شرح بیج 2سے اڑھائی کلو گرام فی ایکڑ رکھیں نیز بیج کا اگاؤ 90فیصد سے زیادہ ہونا چاہیے
۔ریسرچ انفارمیشن یونٹ آری فیصل آباد کے ماہرین تیلدار اجناس نے کہا کہ کاشتکار وں کو سورج مکھی کی کاشت کیلئے پوری گہرائی تک ہل چلاناچاہیے جبکہ کاشتکار سورج مکھی کی کاشت کیلئے بھاری میرازمین کاانتخاب کریں اور اس میں پوری گہرائی تک ہل چلائیں تاکہ پودے کی جڑیں گہرائی تک جا کر زمین سے ضروری خوراکی اجزاحاصل کرکے بہتر نشو ونما پاسکیں۔
انہوں نے کہا کہ فیصل آباد ڈویژن سمیت بہاولپور، رحیم یار خان، خانیوال، ملتان، وہاڑی، بہاولنگر، مظفر گڑھ اور ڈیرہ غازیخان کے کاشتکار بہاریہ سورج مکھی کی کاشت وسط جنوری تک مکمل کر سکتے ہیں۔
انہوں نے کہا کہ کاشتکار اچھے اگاؤ کیلئے صاف ستھرے و دوغلے بیج کا انتخاب کریں اورفصل کو قطاروں میں کاشت کیاجائے جبکہ قطاروں کا درمیانی فاصلہ سوا دوسے اڑھائی فٹ اور پودوں کا درمیانی فاصلہ آبپاش علاقوں میں 12انچ رکھا جائے اور اس بات کا بھی خیال رکھاجائے کہ بیج وتر میں کاشت کیا جائے اور بیج کی گہرائی زیادہ سے زیادہ 2انچ ہو۔ انہوں نے کہا کہ اگر کھیلیوں پر کاشت کرنا ہو تو کھیلیاں رجر سے شرقاً غرباً نکالیں۔
انہوں نے بتایاکہ سورج مکھی کو پلانٹر، ٹریکٹر ڈرل یا سنگل روکاٹن ڈرل، پوریا کرایا ڈبلنگ (چوپا) کے ذریعے بھی کاشت کیا جا سکتا ہے۔
Short Link: https://urdu.app.com.pk/urdu/?p=532336
