کرائسٹ چرچ۔14مارچ (اے پی پی):پاکستان اور نیوزی لینڈ کی کرکٹ ٹیموں کے درمیان پانچ ٹی 20 انٹرنیشنل میچوں پر مشتمل سیریز کا پہلا میچ 16 مارچ بروز اتوار کو ہیگلے اوول کرائسٹ چرچ میں کھیلا جائے گا۔ میچ پاکستانی وقت کے مطابق صبح سوا چھ بجے شروع ہو گا۔ ٹی 20 سیریز میں پاکستان ٹیم کی قیادت سلمان علی آغا کر رہے ہیں، اس سے قبل انہوں نے زمبابوے کے خلاف سیریز میں قیادت کی تھی جو پاکستان نے 1-2 سے جیتی تھی۔ پاکستان ٹیم میں شاداب خان، محمد حارث، عمیر بن یوسف، حسن نواز، عبدالصمد، عرفان نیازی، خوشدل شاہ، عباس آفریدی، محمد علی، شاہین شاہ آفریدی، حارث رؤف، سفیان مقیم، ابرار احمد، جہانداد خان اور عثمان خان شامل ہیں۔ حسن نواز اور عبدالصمد ڈومیسٹک کرکٹ میں متاثر کن کارکردگی کے سبب سلیکٹرز کا اعتماد حاصل کرنے میں کامیاب ہوئے ہیں۔
پاکستان ٹیم نے کرائسٹ چرچ پہنچنے کے بعد کوچز کی نگرانی میں ٹریننگ سیشن کیا ہے اور کپتان سلمان علی آغا نے اس امید کا اظہار کیا ہے کہ ٹیم کی تیاری اچھی ہے اور وہ سیریز میں بہترین کارکردگی دکھانے کی کوشش کرے گی۔ سلمان علی آغا نے ٹیم میں نئے کھلاڑیوں کی شمولیت کے بارے میں کہا کہ ان کھلاڑیوں کا سلیکشن ڈومیسٹک کرکٹ میں عمدہ کارکردگی کی بنیاد پر ہوا ہے اور ان کے لیے بہترین موقع ہے کہ وہ انٹرنیشنل کرکٹ میں بھی اپنی بہترین صلاحیتوں کا مظاہرہ کریں۔
انہوں نے کہا کہ یہ نوجوان ٹیم ہے اور یہ سیریز میں بے خوف کرکٹ کھیلے گی۔ نیوزی لینڈ کی قیادت مائیکل بریسویل کر رہے ہیں۔ ان کی بھی بحیثیت کپتان یہ دوسری سیریز ہے۔ اس سے قبل انہوں نے گزشتہ سال پاکستان میں کھیلی گئی سیریز میں قیادت کی تھی جو 2-2 سے برابر رہی تھی۔ نیوزی لینڈ کی ٹیم میں سات وہ کھلاڑی شامل ہیں جو حال ہی میں آئی سی سی چیمپئنز ٹرافی کا فائنل کھیلے تھے۔ فاسٹ باؤلر بین سیئرز اور اسپنر اش سوڈھی کی ٹیم میں واپسی ہوئی ہے۔
کائل جیمیسن اور ول او راک کا سلیکشن پہلے تین میچوں کے لیے ہوا ہے جبکہ میٹ ہینری فٹ ہونے کی صورت میں آخری دو میچوں میں دستیاب ہوں گے۔ پاکستان اور نیوزی لینڈ کے درمیان اب تک 44 ٹی 20 انٹرنیشنل کھیلے جا چکے ہیں جن میں پاکستان نے 23 اور نیوزی لینڈ نے 19 میچوں میں کامیابی حاصل کی ہے جبکہ دو میچز نتیجہ خیز ثابت نہیں ہو سکے ہیں۔ دونوں ٹیموں کے درمیان سیریز کا دوسرا ٹی 20 میچ 18 مارچ کو ڈنیڈن، تیسرا میچ 21 مارچ کو آکلینڈ، چوتھا میچ 23 مارچ کو ماؤنٹ مانگونوئی جبکہ پانچواں اور آخری میچ 26 مارچ کو ویلنگٹن میں کھیلا جائے گا۔
Short Link: https://urdu.app.com.pk/urdu/?p=572639
