قاہرہ ۔8اپریل (اے پی پی):مصر، فرانس اور اردن کے رہنماؤں نے فلسطینیوں کے تحفظ اور انہیں ہنگامی انسانی امداد کی فوری اور مکمل رسائی کو یقینی بنانے کے لیے فوری طور پر جنگ بندی کا مطالبہ کیا۔العربیہ کے مطابق انہوں نے اس بات پر زور دیا کہ ایک بااختیار فلسطینی اتھارٹی کو غزہ پٹی پر حکومت کرنے کی واحد ذمہ داری قبول کرنی چاہیے۔مصر کے دارالحکومت قاہرہ میں سہ فریقی سربراہی اجلاس کے بعد ایک مشترکہ بیان میں، مصری صدر عبدالفتاح السیسی، فرانسیسی ہم منصب ایمانوئل میکرون اور اردن کے شاہ عبداللہ دوم نے 19 جنوری کو طے پانے والے جنگ بندی معاہدے پر عمل درآمد کا مطالبہ کیا ہے ۔
انہوں نے اس بات پر بھی زور دیا کہ شہریوں اور انسانی ہمدردی کے کارکنوں کی حفاظت اور امداد تک مکمل رسائی کو یقینی بنایا جائے۔ انہوں نے کہ یہ وہ ذمہ داریاں ہیں جن پر بین الاقوامی قانون اور بین الاقوامی انسانی قانون کے تحت عمل درآمد ہونا چاہیے۔انہوں نے مغربی کنارے اور مشرقی القدس میں بگڑتی ہوئی انسانی صورتحال پر بھی اپنی شدید تشویش کا اظہار کیا۔
انہوں نے تمام یکطرفہ اقدامات کو ختم کرنے کا مطالبہ کیا جو دو ریاستی حل کے حصول کے امکانات کو کمزور کر رہی ہیں۔ انہوں نے القدس میں مقدس مقامات کی تاریخی حیثیت کا احترام کرنے کی ضرورت پر بھی زور دیا۔فلسطینیوں کی نقل مکانی کو مسترد کرتے ہوئے انہوں نے فلسطینیوں کو ان کی سرزمین سے بے گھر کرنے اور فلسطینی زمینوں کے الحاق کی کسی بھی کوشش کو مسترد کرنے کا اظہار کر دیا۔ اس سلسلے میں انہوں نے غزہ کی تعمیر نو کے منصوبے کے لیے بین الاقوامی حمایت پر زور دیا ہے۔
Short Link: https://urdu.app.com.pk/urdu/?p=579331
