راولپنڈی۔13اپریل (اے پی پی):پاکستان سپر لیگ 10 کے دوران کرکٹ کے شائقین کے لیے زبردست انعامات کا اعلان کر دیا گیا ہے۔ ہر میچ میں ایک خوش نصیب ٹکٹ ہولڈر کو موٹر سائیکل انعام میں دی جائے گی جبکہ دیگر کئی انعامات بھی شائقین کرکٹ کے منتظر ہوں گے۔ پی سی بی کے مطابق شائقین کرکٹ گولوٹ لو ایپ کے ذریعے اس قرعہ اندازی میں آن لائن حصہ لے سکیں گے۔
یہ ایپ بآسانی گوگل پلے اسٹور اور ایپل ایپ اسٹور سے ڈاؤن لوڈ کی جا سکتی ہے۔ ہر میچ ٹکٹ کے ساتھ دیا گیا کیو آر کوڈ گولوٹ لو کی ایپ میں اسکین کر کے قرعہ اندازی میں شامل ہوا جا سکتا ہے۔ منتظمین کے مطابق قرعہ اندازی کا عمل شفاف اور خودکار نظام کے تحت انجام پائے گا جس سے ہر شائق بآسانی شامل ہو سکے گا۔ جیتنے والے خوش نصیب شائق کا اعلان میچ کے دوران اننگز بریک میں اسٹیڈیم میں کیا جائے گا جبکہ میچ کے اختتام پر اسے موٹر سائیکل انعام میں دی جائے گی۔
پی ایس ایل کے میچز کی ٹکٹیں آن لائن ویب سائٹ pcb.tcs.com.pk اور ملک بھر میں موجود نجی کوریئر سینٹرز پر دستیاب ہیں۔ اس کے علاوہ گولوٹ لو کے کیو آر کوڈز ہر انکلوژر کے انٹری گیٹس پر آویزاں ہوں گے تاکہ شائقین سہولت سے قرعہ اندازی میں شامل ہو سکیں۔
Short Link: https://urdu.app.com.pk/urdu/?p=581267
