ترجمان دفتر خارجہ کی آپریشن”بنیان مرصوص” میں شاہین میزائل کے استعمال کے حوالے سے بھارتی میڈیا کے بے بنیاد دعوئوں کی تردید

اسلام آباد۔19مئی (اے پی پی):پاکستان نے آپریشن”بنیان المرصوص” میں شاہین میزائل کے استعمال کے حوالے سے بھارتی میڈیا کے بے بنیاد دعوئوں کو سختی سے مسترد کر دیا ہے ۔ پیر کو ترجمان دفتر خارجہ نے اس حوالے سے بھارتی میڈیا کے بے بنیاد دعوئوں کے جواب میں کہا کہ وزارت خارجہ ہندوستانی میڈیا کے بعض حصوں میں زیر گردش ان بے بنیاد الزامات کو سختی سے مسترد کرتا ہے جن میں یہ جھوٹا دعویٰ کیا گیا کہ پاکستان نے آپریشن’’ بنیان مرصوص ‘‘کے دوران شاہین میزائل کو استعمال کیا تھا۔

ترجمان دفتر خارجہ کی جانب سے جاری بیان کے مطابق یہ دعوے بھارتی فوج کے آفیشل ٹویٹر ہینڈل کی جانب سے ایک ویڈیو کے اجراء کے بعد شروع ہوئے ہیں جس میں مبینہ طور پر پاکستان کے شاہین میزائل کا استعمال دکھایا گیا ۔ ترجمان نے کہا کہ یہ سمجھتے ہوئے کہ یہ دعویٰ بے بنیاد ہے، بھارتی فوج نے فوری طور پر گمراہ کن ویڈیو کو حذف کر دیا تاہم اس وقت تک بھارتی میڈیا کے بعض حصے پہلے ہی بغیر تصدیق کے جھوٹے بیانیے کو آگے بڑھا چکے تھے۔

ترجمان دفتر خارجہ نے اس امر پر افسوس کا اظہار کیا کہ کچھ ہندوستانی میڈیا ادارے اس ڈس انفارمیشن کا پرچار کررہے ہیں۔ یہاں یہ امر قابل ذکر ہے کہ بھارتی فوج کا آفیشل ہینڈل اس معاملے پر خاموش ہے جبکہ اس نے غلط پوسٹ کے لیے نہ تو وضاحت کی اور نہ ہی اس کی تردید کی ہے۔ تجزیہ کاروں کا مشاہدہ ہے کہ اس طرح کی ڈس انفارمیشن مہمات آپریشن "سندور ” میں بھارت کی ناکامیوں کو دانستہ طور پر چھپانے کی کوشش کا حصہ ہیں جو کہ پاکستان کی روایتی فوجی صلاحیتوں کے مظاہرہ کا نتیجہ تھیں۔

مزید برآں یہ من گھڑت کہانیاں نئی ​​دہلی کی جانب سے جنگ بندی کے حوالے سے گمراہ کن بیانیہ اور پاکستان کی طرف سے نام نہاد "جوہری بلیک میلنگ” کے بے بنیاد الزامات کو ہوا دینے کی جاری کوششوں سے ہم آہنگ ہیں۔ ترجمان نے کہا کہ پاکستان کی طرف سے استعمال ہونے والے ہتھیاروں کی رینج آئی ایس پی آر کی 12 مئی 2025ء کی پریس ریلیز میں تفصیل سے بیان کی گئی ہے۔

پاکستان کی مسلح افواج نے پریسیزن گائیڈڈ، طویل فاصلے تک مار کرنے والے الفتح سیریز کے میزائل ایف 1 اور ایف 2 کے ساتھ ساتھ جدید گولہ و بارود ، انتہائی باصلاحیت لانگ رینج لوئٹرنگ کلر ڈرون اور طویل فاصلے تک مار کرنے والی آرٹلری کا استعمال کیا۔

ان اثاثوں کے ذریعہ ہندوستان اور بھارت کے غیر قانونی زیر تسلط جموں و کشمیر میں جن فوجی مقامات کو نشانہ بنایا گیا ہے وہ بھی 12 مئی کی آئی ایس پی آر کی پریس ریلیز میں بیان ہیں۔ ترجمان نے کہا کہ غیر تصدیق شدہ اور اشتعال انگیز مواد کو پھیلانا نہ صرف علاقائی استحکام کے لئے نقصان دہ ہے بلکہ یہ سرکاری اداروں کی ناقص پیشہ ورانہ صلاحیت کا بھی غماز ہے۔

Short Link: https://urdu.app.com.pk/urdu/?p=598789