اسلام آباد۔20مئی (اے پی پی):سینیٹ میں پاکستان مسلم لیگ (ن) کے پارلیمانی لیڈر اور خارجہ امور کمیٹی کے چیئرمین سینیٹر عرفان صدیقی نے کہا ہے کہ بانی پی ٹی آئی کے ساتھ رابطوں سے متعلق خبریں بے بنیاد ہیں،کسی خاکی، کسی نوری، کسی ناری نے بانی پی ٹی آئی سے کوئی رابطہ نہیں کیا۔ نجی ٹی وی (جیو) کے پروگرام (جیو پاکستان) میں گفتگو کرتے ہوئے سینیٹر عرفان صدیقی نے کہا کہ بانی پی ٹی آئی سے پس پردہ مذاکرات یا ڈیل کی خبروں میں کوئی صداقت نہیں۔ ایک سوال پر انہوں نے کہا کہ ہمارے رہنماؤں کے مقدمات تو سپریم کورٹ سے شروع ہوتے اور وہیں ختم ہوجاتے تھے، نہ اپیل ہوتی تھی نہ کوئی دلیل سنی جاتی تھی۔
سینیٹر عرفان صدیقی نے کہا کہ عمران خان کے دور حکومت میں ہمارے خلاف بنائے جانے والے مقدمات کی نوعیت انتقامی تھی جبکہ پاکستان مسلم لیگ (ن) انتقامی سیاست پر یقین نہیں رکھتی، ہم نے کسی کو منشیات یا کرایہ داری جیسے جھوٹے مقدمات میں پکڑا ہے، نہ ہتھکڑیاں ڈالی ہیں، نہ جیلوں میں ڈالا ہے۔ انہوں نے کہا کہ پاکستان میں جمہوری مشق جاری ہے، تمام ادارے اپنا کام کر رہے ہیں، کسی شخص کے جیل میں ہونے سے کوئی سیاسی عدم استحکام نہیں آتا، ہم نے نام نہاد سیاسی عدم استحکام کے باوجود اپنی معیشت کو بھی سنبھالا ہے اور اپنی تاریخ کی سب سے بڑی فتح بھی حاصل کی ہے۔
سینیٹر عرفان صدیقی نے اس بات پر زور دیا کہ اگر کسی ایک شخص کو عدالتی عمل کے بغیر رہا کر دیا جاتا ہے تو ہمیں باقی 90 ہزار قیدیوں کا بھی سوچنا ہوگا، پی ٹی آئی کے منفی پروپیگنڈے کے باوجود چیف آف آرمی سٹاف کا قد بہت بلند ہو گیا ہے۔ انہوں نے کہا کہ 10 مئی کے بعد سے ملک کا سیاسی اور عالمی منظر نامہ بدل گیا ہے۔ انہوں نے کہا کہ عدم اعتماد کا آئینی طریقہ کار پہلی بار عمران خان کی حکومت کو نکالنے کے لئے استعمال کیا گیا جس ایوان نے عمران خان پر اعتماد کیا تھا اسی ایوان نے ان پر عدم اعتماد کیا اور ان کی حکومت چلی گئی۔ اگر پی ٹی آئی عددی تعداد پوری کر لیتی ہے تو ہم خندہ پیشانی سے اس کا مقابلہ کریں گے، ہم آئین اور قانون کی پاسداری کریں گے اور کوئی بھی غیر آئینی اقدام نہیں اٹھائیں گے، ہمارے پاس کوئی قاسم سوری نہیں، ہم قومی اسمبلی بھی نہیں توڑیں گے۔
سینیٹر عرفان صدیقی نے کہا کہ عدم اعتماد کا خواب پی ٹی آئی کے بہت سے خوابوں کی مانند ایک اور خواب ہے، پاکستان آگے بڑھ رہا ہے، قومی سلامتی سمیت تمام حوالوں سے پاکستان مستحکم ہے۔ سینیٹر عرفان صدیقی نے بھارتی جارحیت پر سوال کے جواب میں دو ٹوک موقف اختیار کرتے ہوئے کہا کہ مودی سرکار نے بھارت کا مکروہ چہرہ دنیا کے سامنے عیاں کر دیا ہے، بھارت سمیت مقبوضہ جموں و کشمیر میں انسانی حقوق کی پامالیاں جاری ہیں،ہندوستان نے پہلے بھی جارحیت کر کے منہ کی کھائی،بھارت کو فوجی اور سیاسی شکست کے ساتھ ساتھ سفارتی سطح پر بھی شکست ہوئی۔
انہوں نے کہا کہ پاکستان کے ساتھ بہت سے ممالک کھڑے تھے جو ہماری سفارتی کامیابی کا منہ بولتا ثبوت ہے، مودی سرکار کو جو ناکامی ہوئی ہے وہ یہ داغ دھونے کی کوشش کر سکتا ہے لیکن اسے یہ یاد رکھنا چاہئے کہ دوبارہ جارحیت کی تو اس کا نتیجہ پہلی مہم جوئی سے مختلف نہیں ہو گا۔
Short Link: https://urdu.app.com.pk/urdu/?p=599315
