اسلام آباد۔22مئی (اے پی پی):پاکستان کے نامور اور ناقابل شکست پہلوان ، رستم زماں المعروف گاما پہلوان کا یوم پیدائش جمعرات 22مئی کو منایا گیا ۔ گا ما پہلوان کا اصل نام غلام محمد بخش بٹ تھا اوروہ 22 مئی 1878ء کو امرتسر میں پیداہوئے جن کا تعلق کشمیری بٹ خاندان سے تھا ۔انہوں نے ورلڈ چیمپئن کا مقابلہ جیتا اس لیے انہیں “رستمِ زماں‘‘ کے خطاب سےنوازا گیا۔وہ قدیم فنِ پہلوانی کے بانیوں میں سے ایک تھے۔
گاما پہلوان نے 1902ء میں صرف 22 سال کی عمر میں 1200 کلو وزنی پتھر اٹھایا اور اپنے سینے تک بلند کر کے کچھ قدم چلے بھی تھے۔ یہ پتھر آج بھی بھارت کے بارودا میوزیم سایاجی باغ میں موجود ہے اور اس پر تحریر کیا گیا ہے کہ اس پتھر کو 23 دسمبر 1902ء کو گاما پہلوان نے اٹھایا تھا۔ دوسری جانب میوزیم حکام کا کہنا ہے اس پتھر کو اٹھانے کے لیے ہائڈرالک مشین کا استعمال کیا جاتا ہے اور 25 آدمیوں سے بھی یہ پتھر اٹھانا مشکل ہے،میوزیم کے رجسڑ میں انٹری نمبر 10-10 میں تحریرہے کہ یہ پتھر 1912ء میں میوزیم میں لایا گیا۔
گاما پہلوان نے اپنے 50 سالہ کیریئر میں 5 ہزار سے زائدمقابلے کئے اورکسی ایک مقابلہ میں بھی شکست نہیں کھائی ۔1916 تک گاما پہلوان نے پورے ہندوستانی پہلوانوں بشمول پنڈت بدو برہمن کو شکست دے دی تھی۔ 15 اکتوبر 1910کو انہیں جنوبی ایشیا کی سطح پر ورلڈ ہیوی ویٹ چیمپئن کے اعزاز سے نوازا گیا تھا۔
واضح رہے کہ پہلوانی کی پوری تاریخ میں گاما پہلوان واحد پہلوان ہیں جنہیں 50 سال سے زیادہ عرصہ پر محیط کیریئر میں ایک بار بھی شکست کا سامنا نہیں کرنا پڑا۔گاما پہلوان کو حکومت پاکستان کی جانب سے 1959ء میں صدارتی تمغہ حسن کارکردگی سے نوازا گیا۔رستم زماں گاما پہلوان 21 مئی 1960ء کو لاہور میں انتقال کر گئے تھے۔ گاما پہلوان کی سالگرہ کے موقع پر ان کے مداحوں کی جانب سے خراج تحیس پیش کیا گیا۔
Short Link: https://urdu.app.com.pk/urdu/?p=600048
