اسلام آباد۔11جولائی (اے پی پی):وفاقی وزیر داخلہ محسن نقوی کی ہدایت پر وزیر مملکت برائے داخلہ طلال چوہدری نے دھواں چھوڑنے والی گاڑیوں کی ٹیسٹنگ مہم کا باقاعدہ افتتاح کر دیا، اسلام آباد ٹرانسپورٹ اتھارٹی کی ٹیم نے جدید آلات سے وزیر داخلہ کی گاڑی کا معائنہ کیا ۔ وزارت داخلہ کی طرف سے جاری بیان کے مطابق اسلام آباد میں وزیر اعظم اور وزارت داخلہ کی ہدایت پر اصلاحات جاری ہیں، اسلام آباد میں بین الاقوامی معیار کے انفراسٹرکچر کے ساتھ ماحول پر بھی کام کیا جا رہا ہے۔ وزیر مملکت برائے داخلہ نے کہا کہ چند سال سے اسلام آباد کا ائیر کوالٹی انڈیکس بڑھ رہا تھا، ائیر کوالٹی انڈیکس 200 تک پہنچنا شروع ہو گیا تھا جسے کنٹرول کرنے کے لئے اسلام آباد وہیکل انسپکشن کا آغاز کیا گیا ہے۔ وزیر مملکت برائے داخلہ نے کہا کہ ٹیسٹنگ کے لیے ہم نے بین الاقوامی معیار کے آلات منگوائے ہیں
حکومت پنجاب نے اپنی تربیت یافتہ ٹیم بھیجی، ان کا شکریہ ادا کرتے ہیں۔ طلال چوہدری نے کہا کہ ڈپثی کمشنر اسلام آباد عرفان میمن نے اپنے گھر سے ٹیسٹنگ کا آغاز کیا ہے، سب سے پہلے ہم سرکاری گاڑیوں کی ٹیسٹنگ کا آغاز کریں گے۔ وزیر مملکت داخلہ نے کہا کہ اولڈ پریڈ گرائونڈ کے پاس ٹیسٹنگ کا سسٹم بنایا جائے گا، پاس ہونے والی گاڑیوں پر بار کوڈ آویزاں کیا جائے گا۔ طلال چوہدری نے کہا کہ اسلام آباد میں زگ زیگ ٹیکنالوجی کی علاوہ کوئی بھٹہ کام نہیں کر رہا ہے، جو بھٹے آلودگی کا باعث تھے وہ بند کر دیئے گئے ہیں۔ انہوں نے کہا کہ ماحول کو سب سے زیادہ نقصان گاڑیوں کے دھوئیں سے تھا، اسلام آباد میں اب دھواں چھوڑنے والی کوئی گاڑی داخل نہیں ہوگی، دھواں چھوڑنے والی گاڑیوں کو جرمانہ کیا جائے گا۔ وزیر مملکت برائے داخلہ طلال چوہدری نے کہا کہ وزیر اعلیٰ پنجاب کا شکریہ ادا کرتے ہیں انھوں نے اپنی ٹیم بھیجی ہے۔
