ایس ایم ایز کی ترقی ، عالمی منڈیوں تک رسائی کےلئے ’’پاکستان گلوبل بزنس سمٹ ‘‘ کا انعقاد

اسلام آباد۔12جولائی (اے پی پی):گلوبل ایس ایم ایز بزنس ہوم (سوئٹرز لینڈ)نے پاکستان کے چھوٹے اور درمیانے درجے کے کاروباری ادارے کے شعبہ کو پائیدار حکمت عملی اور قابل اعتماد شراکت داری کے ذریعے عالمی منڈیوں سے جوڑنے کے عزم کا اعادہ کرتے ہوئے کہا ہے کہ عالمی رجحانات کے تحت رہنمائی کے ذریعے پاکستانی مصنوعات کے معیار میں بہتری ،پیداوار میں اضافہ اور عالمی منڈیوں تک رسائی کےلئے ہر ممکن تعاون فراہم کیا جائے گا ۔گلوبل ایس ایم ایز بزنس ہوم (سوئٹرز لینڈ)، پاکستان انڈسٹریل سیونگ مشینز امپورٹرز اینڈ ڈیلرز ایسوسی ایشن اور دیگر کے اشتراک سے ’’پاکستان گلوبل بزنس سمٹ 2025 ‘‘کا انعقاد کیا گیا جس کی صدارت عالمی تنظیم کے صدر انیس خان نے کی ، اس موقع پر پاکستان کی کنٹری ہیڈ آمنہ احمد رضا ،مشیر ثاقب مجید شیخ ،پسمیڈا کے وائس چیئرمین محمد یاسین ،لاہور چیمبر کے نائب صدر شاہد نذیر چوہدری، پریگمیا کے ڈاکٹر ایاز الدین،چیئرمین فارورڈ سپورٹس خواجہ مسعود اختر، لاہور چیمبر کے سید سلمان ،آصف خان، لسما کے چیئرمین سید سفیر عباس اور پاکستان رومانیہ بزنس کونسل کے چیئرمین خواجہ فائق سمیت دیگر معروف کاروباری رہنمائوں نے بھی شرکت کی۔ پسمیڈا کی دعوت پر ترکیہ قونصلیٹ کے کمرشل اتاشی نورتتین دیا مر نے بزنس سمٹ میں خصوصی شرکت کی ۔ پاکستان گلوبل سمٹ2025 میں پاکستان کے چھوٹے اور درمیانے درجے کے کاروبار کو عالمی تجارت خصوصا یورپی منڈیوں تک رسائی فراہم کرنے ،تصدیق شدہ خریداروں سے مضبوط روابط، مارکیٹ ریسرچ، ویزا سہولت، چیمبر زسے وابستگی، عالمی رجحانا ت کے مطابق جدت، ترقیاتی حکمت عملی اور ریگولیٹری معاونت جیسے اقدامات کے حوالے سے آگاہی فراہم کی گئی ۔ اس موقع پر گلوبل ایس ایم ایز بزنس ہوم (سوئٹرز لینڈ)کے صدر انیس خان نے خطاب میں کہا کہ ہمارا مقصد چھوٹے اور درمیانے درجے کے کاروبار کے فروغ ، دنیا میں بدلتے رجحانات خصوصا جدید ٹیکنالوجی کے ذریعے معیارمیں بہتری ،پیداوار میں اضافہ ، تیار مصنوعات کو دنیا کے مختلف ممالک خصوصا یورپی ممالک تک رسائی کے لئے عملی پیشرفت میں کلیدی معاونت فراہم کرنا ہے ۔ ہم پاکستان کی ایس ایم ایز سے وابستہ مینو فیکچررز کی مختلف ممالک کے مینو فیکچررز سے ون ٹو ون ملاقاتوں کے خواہاں ہیں جس سے نہ صرف دو طرفہ روابط میں مضبوطی آئے گی بلکہ اس سے پاکستان کی ایس ایم ایز ترقی کے نئے دورمیں داخل ہو گی ۔ کنٹری ہیڈ آمنہ احمد نے کہا کہ ہمارا مقصد صرف اور صرف چھوٹے اور درمیان درجے کے کاروبار کوترقی کے مواقع فراہم کرنا ہے ۔ پسمیڈا کے وائس چیئرمین محمد یاسین نے کہا کہ ہماری تنظیم کا لیدر،فٹ وئیر، گارمنٹس ،ٹیکسٹائل اور سپورٹس انڈسٹری سے براہ راست تعلق ہے ۔ گلوبل ایس ایم ایز بزنس ہوم نے یقین دہانی کرائی کہ پاکستان اپنی مصنوعات کی عالمی معیار کے مطابق تیاری کو یقینی بنا کر عالمی منڈیوں تک رسائی حاصل کر سکتا ہے ، ایس ایم ایز کو پائوں پر کھڑا کر لیا جائے تو پاکستان کو کسی غیر ملکی قرضے کی ضرورت نہیں رہے گی ۔ترکیہ کے کمرشل اتاشی نورتتین دیا مر نے کہا کہ پاکستانی اور ترکیہ کی کمپنیوں میں جوائنٹ ونچر کے لئےدوطرفہ معاہدوں کےلئے کردار ادا کروں گا۔ لاہور چیمبر کے نائب صدر شاہد نذیر چوہدری نے گلوبل ایس ایم ایز بزنس کے ذمہ داران سے اظہار تشکر کرتے ہوئے کہا کہ اس سے پاکستان میں چھوٹے اور درمیانے درجے کے کاروبارکو ترقی کے بے پناہ مواقع میسر آئیں گے۔