پاکستان دہشت گردی کے متاثرین کے عالمی دن کو عقیدت و احترام سے منانے اور خراج تحسین پیش کرنےکے لئے عالمی برادری کی صف میں شامل ہے،ترجمان دفتر خارجہ

اسلام آباد۔21اگست (اے پی پی):پاکستان دہشت گردی کے متاثرین کے عالمی دن کو عقیدت و احترام سے منانے اور خراج تحسین پیش کرنےکے لئے عالمی برادری کی صف میں شامل ہے، یہ دن ہمیں اس اجتماعی ذمہ داری کی یاد دلاتا ہے کہ ہم دہشت گردی کے تمام متاثرین کے ساتھ یکجہتی کا مظاہرہ کریں، ان کی عظمت کو خراج تحسین پیش کریں اور اس لعنت کی تمام اشکال اور اقسام کے خاتمے کے عزم کی تجدید کریں۔ جمعرات 21 اگست 2025 کو دہشت گردی کے متاثرین کے عالمی دن کے موقع پر بیان میں ترجمان دفتر خارجہ نے کہا کہ پاکستان دہشت گردی کا براہ راست شکار رہا ہے جس میں حال ہی میں جعفر ایکسپریس پر مبینہ دہشت گردانہ حملہ جس میں معصوم شہری جاں بحق ہوگئے اور خضدار میں اسکول بس کو بم دھماکے سے اڑانے والا واقعہ بھی شامل ہے، جس کے نتیجے میں معصوم بچوں سمیت کئی قیمتی جانیں ضائع ہوئیں۔ یہ کوئی پہلا واقعہ نہیں ہے، پاکستان میں دہشت گردی سرحدوں کے پار سے منظم سازش اور منصوبہ سازی کے ساتھ کی جاتی ہے۔ پاکستان دہشت گردی کی نئی اشکال کا بھی سامنا کر رہا ہے، جن میں جعلی خبریں اور غلط معلوماتی مہمات، بھارتی سرپرستی میں غیر علاقائی قتل کی مہمات، اور آبی دہشت گردی (ہائیڈرو ٹیررازم) شامل ہیں۔

پاکستان کی سیکورٹی فورسز اور عوام نے بے مثال استقامت کا مظاہرہ کرتے ہوئے نہ صرف اپنے وطن بلکہ علاقائی اور عالمی امن کی تحفظ کے لیے لازوال قربانیاں دی ہیں۔ اس جدوجہد میں 90 ہزار سے زائد پاکستانی اپنی جانوں کی قربانیاں دے چکے ہیں اور قوم کو 150 ارب ڈالر سے زائد کے معاشی نقصانات کا سامنا کرنا پڑا ہے۔ ہم اپنے شہیدوں اور ہیروز کے جذبہء شجاعت کو خراج تحسین پیش کرتے ہیں جن کی قربانیاں قوم کے لیے طاقت اور اتحاد کی روشن مثال ہیں۔ اس دن، ہم بھارت کے غیر قانونی طور پر مقبوضہ جموں و کشمیر کے مظلوم عوام کے ساتھ اپنی غیر متزلزل یکجہتی کے عزم کی بھی تجدید کرتے ہیں، جو بھارتی قابض افواج کی جانب سے روا رکھے جانے والے ریاستی دہشت گردی کی بدترین شکل کا سامنا کر رہے ہیں۔ دہائیوں سے معصوم کشمیریوں کو منظم قتل، جبری گمشدگی، خودساختہ حراستوں اور سنگین انسانی حقوق کی خلاف ورزیوں کا سامنا ہے۔

اس طرح کے غیر انسانی جبر کے باوجود، مقبوضہ کشمیر کے عوام کی مزاحمت اقوام متحدہ کے منظور کردہ حق خودارادیت کے مطالبہ پر برقرار ہیں۔اسی طرح، ہم فلسطین کے مستحکم عوام کو بھی خراج تحسین پیش کرتے ہیں، جو اسرائیلی قابض افواج کی جانب سے مسلسل جارحیت، منظم انسانی حقوق کی خلاف ورزیوں اور ریاستی دہشت گردی کا سامنا کر رہے ہیں۔ ان کے اقدامات نہ صرف بین الاقوامی قانون کی سنگین خلاف ورزی ہیں بلکہ فلسطینی عوام کی نسل کشی کے مترادف ہیں۔طویل المدتی غیر حل شدہ تنازعات، غیر ملکی قبضہ، اور حق خودارادیت سے انکار انتہا پسندی اور دہشت گردی کے حالات پیدا کرتے ہیں جنہیں مل کر حل کیا جانا چاہیے۔ ترجمان نے کہا کہ آج جب ہم دہشت گردی کے متاثرین کو یاد کر رہے ہیں، ہم عالمی برادری سے اپیل کرتے ہیں کہ وہ ہمارے ساتھ مل کر بین الاقوامی شراکت، مکالمہ اور تعاون کو مضبوط بنانے، بلا امتیاز دہشت گردی کے خاتمے، متاثرین اور ان کے خاندانوں کی حمایت اور پرامن اور محفوظ دنیا کے قیام کے لیے مشترکہ کوششیں کرے۔