کوئٹہ۔ 26 اگست (اے پی پی):وزیراعلیٰ بلوچستان میرسرفرازبگٹی نے کہاہے کہ بلوچستان کے عوام جلد بینک آف بلوچستان کے حوالے سے خوشخبری سنیں گے،بینک کے قیام سے متعلق ابتدائی فیزبیلٹی رپورٹ قابل عمل ہے ۔ان خیالات کااظہار انہوں نے اپنی زیر صدارت اجلاس سے خطاب کرتے ہوئے کیا۔اجلاس میں بینک آف بلوچستان کے قیام کا منصوبہ جلد فعال بنانے پر اتفاق کیاگیا۔ حکام کی جانب سے بینک آف بلوچستان کے قیام سے متعلق ابتدائی فزیبلٹی رپورٹ پیش کی گئی ۔
وزیر اعلی بلوچستان نے منصوبہ قابلِ عمل قرار دیتے ہوئے ایک ہفتے میں آپریشنل پلان مرتب کرنے کی ہدایت دی ۔میرسرفرازبگٹی نے کہاکہ بینک آف بلوچستان کے ذریعے صوبے میں معاشی سرگرمیوں کو فروغ ملے گا، بینک آف بلوچستان کے قیام سے عوام، تاجروں اور سرمایہ کاروں کو معیاری بنکنگ سہولیات ملیں گی، بلوچستان کے عوام جلد خوشخبری سنیں گے، بینک آف بلوچستان کے ذریعے صوبے میں معاشی سرگرمیوں کو فروغ ملے گا، صوبے کے نوجوانوں کو روزگار کے مواقع بھی فراہم ہوں گے،
بینک آف بلوچستان صوبے کی معیشت میں تاریخی سنگِ میل ثابت ہوگا، بینک صوبائی وسائل کو بروئے کار لا کر ترقیاتی منصوبوں کی رفتار تیز کرے گا۔ اجلاس میں صوبائی وزیر خزانہ میر شعیب نوشیروانی، چیف سیکرٹری بلوچستان شکیل قادر خان ، پرنسپل سیکرٹری بابر خان کے علاوہ بینکنگ سیکٹر کے ماہرین نے آن لائن شرکت کی۔
