آج پاکستان کرکٹ کیلئے نہایت فخر کا دن ہے،چیئرمین پی سی بی محسن نقوی

راولپنڈی۔16نومبر (اے پی پی):پاکستان کرکٹ بورڈ (پی سی بی) کے چیئرمین محسن نقوی نے کہا ہے کہ آج پاکستان کرکٹ کے لیے ایک نہایت فخر کا دن ہے۔ پاکستان شاہینز نے بھارت اے کو 8 وکٹوں سے شکست دیتے ہوئے مقررہ ہدف محض 13.2 اوورز میں حاصل کر لیا۔ چیئرمین پی سی بی نے کہا کہ یہ کارکردگی بے خوف اور ناقابل فراموش مظاہرہ تھی جو ایشیا کپ رائزنگ اسٹارز ٹورنامنٹ میں سامنے آئی۔

انہوں نے نوجوان کھلاڑیوں کی شاندار کارکردگی کی خصوصی تعریف کی اور کہا کہ یہ پاکستان کرکٹ کے روشن مستقبل کی عکاسی ہے۔ محسن نقوی نے قوم کو مبارکباد دیتے ہوئے کہا کہ نوجوان کھلاڑیوں نے شاندار کرکٹ کھیل کر نہ صرف ٹیم بلکہ ملک کے لیے فخر کا لمحہ پیدا کیا۔ ان کا کہنا تھا کہ اس کامیابی سے پاکستان کے نوجوان کھلاڑیوں کی صلاحیتوں اور حوصلے کا پتہ چلتا ہے اور یہ ملک کے لیے امید افزا علامت ہے۔