متحدہ عرب امارات کے صدر شیخ محمد بن زاید کا دبئی ایئر شو کا دورہ ، ملکی دفاعی صنعت کی کارکردگی کو سراہا

دبئی۔18نومبر (اے پی پی):متحدہ عرب امارات کے صدر شیخ محمد بن زاید نے دبئی ایئر شو 2025 کا دورہ کیا اور اس موقع پر اماراتی دفاعی صنعت کی کارکردگی اور نئی پیش رفت کو سراہا۔ امارات نیوز ایجنسی وام کی رپورٹ کے مطابق دبئی ورلڈ سنٹرل میں جاری”مستقبل یہاں ہے”کے عنوان کے تحت 19واں دبئی ایئر شو 21 نومبر تک جاری رہے گا۔ شیخ محمد بن زاید نے اس موقع پر قومی اور بین الاقوامی کمپنیوں کے پویلینز اور اوپن ایریاز میں پیش کی جانے والی ہوا بازی، خلائی ٹیکنالوجی اور دفاعی صنعت کی جدید ترین اختراعات کا جائزہ لیا۔

انہوں نے مختلف کمپنیوں کے نمائندوں سے ملاقات کی، جنہوں نے انہیں نئی سول و عسکری طیارہ سازی، مربوط فضائی دفاعی نظاموں اور جدید ٹیکنالوجیز پر بریفنگ دی۔اپنے دورے کے دوران شیخ محمد بن زاید نے اماراتی کمپنی کیلیڈس گروپ کی تیار کردہ ’بدر-250 (B-250)‘ ملٹی رول ایئرکرافٹ کی باضابطہ رونمائی میں شرکت کی۔ یہ طیارہ مکمل طور پر اماراتی ماہرین نے ڈیزائن اور تیار کیا ہے، جو ملکی دفاعی صنعت میں ایک بڑی پیش رفت ہے۔صدر شیخ محمد بن زاید نے توازن کونسل فار ڈیفنس انیبلمنٹ کے پویلین کا بھی معائنہ کیا، جہاں انہیں کونسل کے تازہ ترین منصوبوں اور اقدامات پر بریفنگ دی گئی۔

انہوں نے قومی دفاعی صنعت کی نمایاں ترقی کو سراہتے ہوئے کہا کہ اس کامیابی میں اماراتی ہنرمندوں اور ماہرین کا کلیدی کردار ہے، جو مسلسل جدت اور مہارت کے ذریعے شعبے کو مضبوط بنا رہے ہیں۔انہوں نے دبئی ایئر شو کو ایک عالمی پلیٹ فارم قرار دیا جو ہوا بازی، خلائی اور دفاعی شعبوں میں بین الاقوامی تعاون، نئی شراکت داریوں اور تکنیکی ترقی کے لیے اہم کردار ادا کرتا ہے۔ انہوں نے کہا کہ یہ ایونٹ امارات کی حیثیت کو عالمی سطح کے بڑے اجتماع اور ٹیکنالوجی کی قیادت کرنے والے مرکز کے طور پر مزید مضبوط کرتا ہے۔

ایونٹ کے موقع پر اماراتی صدر نے چین کی ایوی ایشن انڈسٹری کارپوریشن آف چائنا (AVIC) کے صدر وَی یِنگ بیاؤ سے بھی ملاقات کی، جس میں دبئی ایئر شو کی عالمی اہمیت اور نئی ٹیکنالوجیز کی نمائش پر بات چیت ہوئی۔دورے کے دوران صدارتی دیوان برائے خصوصی امور کے نائب چیئرمین عزت مآب شیخ حمدان بن محمد بن زاید النہیان، متحدہ عرب امارات کے صدر کے مشیر شیخ محمد بن حمد بن تحنون النہیان اور دیگر اعلیٰ حکام بھی موجود تھے۔