عالمی صحت کے معاملات پر توجہ مرکوز کرنے والے سرکردہ پلیٹ فارم ورلڈ ہیلتھ سمٹ 2025 کی رپورٹ جاری

برلن۔10دسمبر (اے پی پی):عالمی صحت کے معاملات پر توجہ مرکوز کرنے والے سرکردہ پلیٹ فارم ورلڈ ہیلتھ سمٹ (ڈبلیو ایس ایچ) 2025 کی رپورٹ جاری کر دی گئی ہے جس میں ’’منقسم دنیا میں صحت کی ذمہ داری لینا‘‘ کے مرکزی خیال کے تحت عالمی صحت کی ترقی کو اجاگر کیا گیا ہے۔ اس سال کے اجلاس میں دنیا بھر سے 144 ممالک کے 45,000 سے زائد آن لائن اور 4,000 سے زیادہ آن سائٹ شرکا نے حصہ لیا اور عالمی صحت کے ڈھانچے کو مضبوط بنانے کے لیے اہم کوششوں کو فروغ دیا۔ سمٹ کے دوران کئی اہم پیش رفت سامنے آئیں جن میں جرمنی کا گلوبل فنڈ برائے ایڈز، تپ دق اور ملیریا کے لیے 1 بلین یورو کے بڑے عزم کا اعلان شامل ہے۔

اس کے علاوہ یو این ایف پی اے اور اس کے شراکت داروں نے خواتین کی صحت میں عالمی فرق کو ختم کرنے کے لیے سرمایہ کاری اور اجتماعی کارروائی کا مطالبہ کرتے ہوئے برلن روڈ میپ کا آغاز کیا۔ نئے جاری کیے گئے گلوبل برڈن آف ڈیزیز سٹڈی 2023 نے ایک اہم بصیرت فراہم کی کہ اگرچہ مجموعی اموات میں کمی آئی ہے، لیکن نوجوانوں کی اموات میں اضافہ ہو رہا ہے اور صحت کی عدم مساوات بڑھ رہی ہے جو پالیسی سازوں کے لیے نئے چیلنجز کا اشارہ ہے۔

یہ تمام نتائج اس بات کی گواہی دیتے ہیں کہ عالمی صحت کا اجلاس نہ صرف تعاون کا ایک پلیٹ فارم ہے بلکہ یہ عالمی سطح پر ٹھوس اقدامات اور شراکت داریوں کو فروغ دینے کا ایک اہم مرکز بھی ہے، جیسا کہ ڈبلیو ایچ او اور یورپی یونین کے سب صحارا افریقہ میں ڈیجیٹل صحت کے نظام کی تبدیلی کے لیے مشترکہ اقدام سے ظاہر ہوتا ہے۔