ایچ ای سی ٹیکنالوجی ڈویلپمنٹ فنڈ کے تحت تیار کردہ 100 سے زائد جدید تکنیکی منصوبوں کی نمائش

اسلام آباد۔31دسمبر (اے پی پی):ہائر ایجوکیشن کمیشن (ایچ ای سی) نے ٹیکنالوجی ڈویلپمنٹ فنڈ (ٹی ڈی ایف) کے تحت مکمل کیے گئے 100 سے زائد کامیاب منصوبوں کی نمائش کے لیے’’ٹیکنالوجی ڈویلپمنٹ فنڈ امپیکٹ شوکیسنگ‘‘ کا انعقاد کیا۔ ایچ ای سی سے جاری بیان کے مطابق نمائش میں رکھی گئی جدت طرازیوں میں صحت، زراعت، بائیوٹیکنالوجی، انجینئرنگ، انرجی سسٹم، ماحولیاتی انتظام اور ابھرتی ہوئی ٹیکنالوجیز کے اہم شعبوں میں کی گئی جدت طرازیاں شامل تھیں۔

یہاں یہ بات قابل ذکر ہے کہ فنڈ کے تحت دیئے گئے 238 منصوبوں میں سے 192 مکمل ہو چکے ہیں جبکہ باقی تکمیل کے مراحل میں ہیں۔دن بھر جاری رہنے والی اس نمائش کا مقصد ٹیکنالوجی ڈویلپمنٹ فنڈ کے اثرات کو اجاگرکرنا، پالیسی سازوں، تعلیمی دماغوں اور صنعت کے پیشہ ور افراد کے لیے ایک پلیٹ فارم مہیا کرنا اور جدت طراز شراکت داروں کی حوصلہ افزائی کرنا تھا۔ تقریب میں حکومتی نمائندوں، تعلیمی اداروں اور صنعت کے رہنماؤں، کاروباری افراد اور ترقیاتی شراکت داروں کواکٹھا کیاگیا۔اپنے خطاب میں چیئرمین ایچ ای سی ندیم محبوب نے کہا کہ ٹی ڈی ایف کا مشن آئیڈیاز کو عملی شکل میں تبدیل کرنا اور جامعات کو سماجی و اقتصادی ترقی کے انجن بننے کے لیے بااختیار بنانا ہے۔

انہوں نے کہا کہ اس پروگرام نے پاکستان کے ٹرپل ہیلکس ماڈل کو مضبوط کیا ہے اور ٹیکنالوجی پر مبنی ترقی کے لیے حکومت، صنعت اور تعلیمی اداروں کو اکٹھا کیا ہے۔ پراجیکٹ کی کامیابیوں پر روشنی ڈالتے ہوئے چیئرمین نے کہا کہ اس اقدام کے تحت اب تک 116 پیٹنٹ فائل کیے جا چکے ہیں اور فائل کیے گئے پیٹنٹ میں سے 25 کو پہلے ہی منظور کیا جا چکا ہے۔ انہوں نے مزید کہا کہ 48 ٹریڈ مارک اور کاپی رائٹس فائل کیے جا چکے ہیں اور 13 کو پہلے ہی اس پروجیکٹ کے تحت منظور کیا جا چکا ہے، اس کے علاوہ 177 پروڈکٹس اور پروٹو ٹائپس، 162 ٹیکنالوجی لائسنسوں پر دستخط اور 18 ابھرتے ہوئے سٹارٹ اپس اور اسپن آف اس منصوبے کی خصوصیات میں شامل ہیں۔

انہوں نے کہا کہ فنڈ نے 330 تحقیقی اشاعتیں کیں جن میں 241 امپیکٹ فیکٹر جرنلز شامل ہیں۔ انہوں نے مزید کہا کہ اس منصوبے کے تحت 5,600 سے زائد پیشہ ور افراد کو تربیت دی گئی ہے، جو مستقبل کے لیے تیار افرادی قوت کی تعمیر کر رہے ہیں۔چیئرمین رستگار گروپ آف کمپنیز امتیاز علی رستگار نے دنیا بھر میں تکنیکی ترقی کی مثال دیتے ہوئے انسانی زندگی میں ٹیکنالوجی کی اہمیت کو اجاگر کیا۔ انہوں نے مسلسل پیشرفت کے لیے جدید تکنیکی منصوبوں پر عمل درآمد میں مستقل مزاجی کی ضرورت پر زور دیا۔

انہوں نے یونیورسٹی اور صنعت کے روابط کو مضبوط بنانے اور مسائل کے حل کی تحقیق کو عملی شکل دینے کی مسلسل کوششوں پر اپنے اطمینان کا اظہار کیا۔ انہوں نے کہا کہ خلا کو دور کرنے کے لیے قومی حکمت عملی وضع کرنا وقت کی اہم ضرورت ہے۔ایگزیکٹو ڈائریکٹر ایچ ای سی ڈاکٹر ضیاء الحق نے ایچ ای سی کے تعلیمی اداروں کو صنعت کے ساتھ ملانے کے عزم کا اعادہ کیا۔ انہوں نے حکومتی نمائندوں، صنعت کے پیشہ ور افراد اور تعلیمی اداروں کے محققین اور اختراع کاروں کا شکریہ ادا کیا کہ انہوں نے نمائش کی تقریب میں شرکت کی۔

ایچ ای سی صنعتی شعبے پر زور دیتا ہے کہ وہ تعلیمی اداروں کے لیے اپنے دروازے کھولے کیونکہ کسی ملک کی سماجی و اقتصادی ترقی کا راز مل کر کام کرنے میں مضمر ہے۔ انہوں نے کہا کہ پاکستان کے جدت طرازی کا مستقبل مضبوط ٹرپل ہیلکس ہم آہنگی، مضبوط صنعت اکیڈمیا پارٹنرشپ، اور پائیدار پالیسی کے نفاذ پر منحصر ہے۔ ایڈوائزر ریسرچ اینڈ انوویشن ڈویژن ڈاکٹر محمد علی ناصر نے اس موقع پر کہا کہ ٹیکنالوجی ڈویلپمنٹ فنڈ ایچ ای سی کے سب سے زیادہ اہم اقدامات میں سے ایک ہے۔

انہوں نے کہا کہ اس منصوبے کا مقصد یونیورسٹیوں کو اشاعتوں سے آگےبڑھ کر پروٹوٹائپس، مصنوعات، پیٹنٹ اور قومی ترجیحات کے ساتھ منسلک تجارتی طور پر قابل عمل کاروباری اداروں کی طرف جانے کے قابل بنا کر اکیڈمی اور صنعت کے درمیان دیرینہ فرق کو ختم کرنا ہے۔ٹیکنالوجی ڈویلپمنٹ فنڈ کو 2016 میں شروع کیا گیا تھا۔ پاکستان میں اپنی نوعیت کے پہلے پروگرام کے طور پر ٹیکنالوجی ڈویلپمنٹ فنڈ نے تعلیمی جدت طرازی کو آمدنی پیدا کرنے والے منصوبوں میں تبدیل کرنے کے لیے ایک پلیٹ فارم کے طور پر کام کیا ہے اور صنعت اور اکیڈمی کے تعاون کو فروغ دیا ہے۔ اس کی کامیابی اور اثرات کے اعتراف میں اس منصوبے کو جون 2027 تک بڑھا دیا گیا ہے۔