وفاقی سیکرٹری تعلیم و پیشہ ورانہ تربیت کا ورچوئل یونیورسٹی آف پاکستان کے ہیڈ آفس کا دورہ

اسلام آباد۔31دسمبر (اے پی پی):وفاقی وزارت تعلیم و پیشہ ورانہ تربیت کے سیکرٹری ندیم محبوب نے ورچوئل یونیورسٹی (وی یو)آف پاکستان کے ہیڈ آفس کا دورہ کیا۔ ریکٹر ورچوئل یونیورسٹی پروفیسر ڈاکٹر ناصر محمود اور یونیورسٹی کی سینئر انتظامیہ نے ہیڈ آفس پہنچنے پر سیکرٹری تعلیم کا استقبال کیا۔

سیکرٹری تعلیم کو اعلی سطحی اجلاس میں رجسٹرار ورچوئل یونیورسٹی نے یونیورسٹی کے تعلیمی و انتظامی امور پر تفصیلی بریفنگ دی۔ اس موقع پر رجسٹرار، ڈینز، ڈائریکٹر کوالٹی انہانسمنٹ، ڈائریکٹر اورک، ڈائریکٹر کیمپسز اور مختلف شعبہ جات کے سربراہان نے شرکت کی جبکہ دیگر افسران آن لائن شریک تھے۔

بریفنگ میں وی یو کی تعلیمی مضبوطیوں، جدید آئی سی ٹی پر مبنی انفراسٹرکچر اور ملک بھر میں اس کے وسیع نیٹ ورک کو اجاگر کیا گیا۔ بتایا گیا کہ ورچوئل یونیورسٹی پانچ فیکلٹیز کے تحت انڈرگریجویٹ اور پوسٹ گریجویٹ پروگرامز میں ملک بھر کے 200 سے زائد کیمپسز کے ذریعے 170 ہزار سے زائد طلبہ کو تعلیم فراہم کر رہی ہے۔ ڈائریکٹر آئی سی ٹی احسن ظفر پوری نے یونیورسٹی کے حال ہی میں قائم کیے گئے ذاتی ڈیٹا سینٹر پر بریفنگ دیتے ہوئے کہا کہ اس جدید سہولت سے آئی سی ٹی صلاحیتوں میں نمایاں اضافہ ہوا ہے اور طلبہ کو فراہم کی جانے والی ڈیجیٹل سہولیات مزید موثر بنی ہیں۔

جنرل منیجر وی یو ٹی وی ڈاکٹر بابر علی نے یونیورسٹی کی جانب سے تیار کردہ میسیو اوپن آن لائن کورسز (ایم او او سیز) کے بارے میں آگاہ کیا جن میں ہائر ایجوکیشن کمیشن کے لیے قومی سطح پر تیار کیے گئے کورسز بھی شامل ہیں۔ انہوں نے کہا کہ یہ اقدامات ڈیجیٹل لرننگ اور صلاحیت سازی کے فروغ میں ورچوئل یونیورسٹی کے فعال کردار کی عکاسی کرتے ہیں۔

ریکٹر ورچوئل یونیورسٹی پروفیسر ڈاکٹر ناصر محمود نے اوپن اینڈ ڈسٹنس لرننگ (او ڈی ایل) کے شعبے میں یونیورسٹی کی خدمات پر روشنی ڈالتے ہوئے کہا کہ وی یو کا تدریسی نظام کم لاگت اور قابل رسائی اعلیٰ تعلیم کی فراہمی میں کلیدی کردار ادا کر رہا ہے۔ ان کے مطابق یہ نظام فیس کے لحاظ سے ملک کے کم ترین تعلیمی ماڈلز میں شمار ہوتا ہے اور اسے مزید مضبوط بنانے کی ضرورت ہے۔

چیئرمین ہائر ایجوکیشن کمیشن نے ورچوئل یونیورسٹی آف پاکستان کی اعلیٰ تعلیم کے فروغ میں خدمات کو سراہتے ہوئے کہا کہ ٹیکنالوجی پر مبنی تعلیمی نظام کے ذریعے معیاری تعلیم تک رسائی کو وسعت دینا وقت کی اہم ضرورت ہے۔ انہوں نے یونیورسٹی کے آئندہ تعلیمی اور ڈیجیٹل اقدامات کے لیے مکمل تعاون کی یقین دہانی بھی کرائی۔