آئی سی سی پلیئر آف دی منتھ کیلئے ماہ دسمبر کے نامزد کھلاڑیوں کا اعلان، مردوخواتین فہرست میں شامل

لاہور۔8جنوری (اے پی پی):آئی سی سی پلیئر آف دی منتھ کیلئے ماہ دسمبر کے نامزد کھلاڑیوں کا اعلان کر دیا گیا ہے۔اس میں مردوں اور خواتین دونوں کی فہرست شامل ہے، جہاں مچل اسٹارک، جیکب ڈفی اور جسٹن گریوز کے نام مردوں کی فہرست میں شامل ہیں، جبکہ خواتین کی فہرست میں لورا وولورڈٹ، سنے لوس اور شافالی ورما شامل ہیں۔مچل اسٹارک نے دسمبر میں تین ایشز ٹیسٹ میچز میں 16 وکٹیں حاصل کیں اور 139 رنز بھی بنائے۔ ان کی بہترین پرفارمنس برسبین کے دوسرے ٹیسٹ میں رہی، جہاں انہوں نے 8 وکٹیں حاصل کیں اور 77 رنز کی شاندار اننگز کھیلی۔ اس کارکردگی کے سبب انہیں پلیئر آف دی میچ کا ایوارڈ ملا۔ اسٹارک کی مجموعی کارکردگی نے ان کو اس ایوارڈ کی دوڑ میں شامل کر لیا۔نیوزی لینڈ کے جیکب ڈفی نے ویسٹ انڈیز کے خلاف تین ٹیسٹ میچز میں 23 وکٹیں حاصل کیں اور سیریز کے بہترین کھلاڑی کا ایوارڈ بھی جیتا۔ ڈفی کی کارکردگی انتہائی شاندار تھی اور ان کی 42 رنز کی اہم اننگز بھی سیریز میں شامل رہی۔

ویسٹ انڈیز کے آل رائونڈر جسٹن گریوز کی کارکردگی بھی غیر معمولی رہی، خاص طور پر نیوزی لینڈ کے خلاف پہلے ٹیسٹ میں انہوں نے ناقابل شکست 202 رنز کی اننگز کھیلی۔ گریوز نے مجموعی طور پر تین ٹیسٹ میچز میں 283 رنز بنائے اور پانچ وکٹیں بھی حاصل کیں، جس سے ان کی جگہ اس ایوارڈ کی نامزدگی میں بنتی ہے۔اسی طرح خواتین کی فہرست میں جنوبی افریقہ کی لورا وولورڈٹ نے تین ون ڈے میچز میں 255 رنز بنائے، اس کے ساتھ ساتھ دو ٹی ٹوئنٹی میچز میں 137 رنز بھی اسکور کیے۔ ان کی بہترین کارکردگی ٹی ٹوئنٹی میں 115 رنز کی ناقابل شکست اننگز رہی، جس کی بدولت انہیں پلیئر آف دی سیریز کا ایوارڈ بھی ملا۔سنے لوس نے بھی شاندار کارکردگی کا مظاہرہ کیا۔انہوں نے تین ون ڈے میچز میں 205 رنز اور چار وکٹیں حاصل کیں۔ اس کے علاوہ دو ٹی ٹوئنٹی میچز میں 118 رنز اور چار وکٹیں حاصل کر کے اپنی آل رائونڈر پرفارمنس کا ثبوت دیا۔بھارت کی شافالی ورما نے سری لنکا کے خلاف پانچ ٹی ٹوئنٹی میچز میں241 رنز بنائے۔

شافالی نے تین نصف سنچریاں اسکور کر کے سیریز میں شاندار کارکردگی دکھائی اور انہیں پلیئر آف دی سیریز کا ایوارڈ ملا۔آئی سی سی پلیئر آف دی منتھ کے فاتحین کا فیصلہ ایک آزاد ووٹنگ اکیڈمی اور کرکٹ کے شائقین کی ووٹنگ سے کیا جائے گا۔ اس میں ووٹنگ اکیڈمی کے 90 فیصد ووٹ اہمیت رکھتے ہیں، جبکہ 10 فیصد ووٹ شائقین کی طرف سے حاصل کیے جاتے ہیں۔ یہ ایوارڈ ہر ماہ کے دوسرے ہفتے میں آئی سی سی کی ڈیجیٹل چینلز پر اعلان کیا جاتا ہے۔