سوڈانی انجینئرز کی کامسٹیک نیو ٹیک مشترکہ پروگرام کے تحت کمپیوٹر ڈیزائننگ میں جدید تربیت

اسلام آباد۔11جنوری (اے پی پی):سوڈانی انجینئرز کے لئے خصوصی تکنیکی تربیتی پروگراموں کے سلسلے میں سرٹیفکیٹ کی تقسیم کی تقریب 13 جنوری (منگل) کو نیشنل یونیورسٹی آف ٹیکنالوجی (NUTECH) میں منعقد ہوگی۔تقریب میں او آئی سی کامسٹیک کے کوآرڈینیٹر جنرل پروفیسر ڈاکٹر محمد اقبال چوہدری ، ریکٹر نیو ٹیک لیفٹیننٹ جنرل معظم اعجازریٹائرڈ ہلال امتیاز (ملٹری)اور پاکستان میں جمہوریہ سوڈان کے سفیر صالح محمد احمد محمد صدیق کے ہمراہ بطور مہمان خصوصی شرکت کریں گے۔ تقریب میں سینئر حکام، ماہرین تعلیم اور شراکت دار اداروں کے نمائندوں کی بھی شرکت متوقع ہے۔

اس اقدام کے تحت سوڈان سے تقریباً 20 انجینئرز نے NUTECH میں منعقدہ خصوصی CAD/CAM/CNC آپریشنز اور مشین بلڈنگ کورس میں حصہ لیا۔ کامسٹیک کے زیر اہتمام مربوط پروگرام کا مقصد تکنیکی مہارتوں کا استحکام، انجینئرنگ کی صلاحیتوں کا فروغ اور صنعت سے متعلقہ ہینڈ آن ٹریننگ اور علم کے تبادلے کے ذریعے او آئی سی کے رکن ممالک کے درمیان تعاون کو فروغ دینا ہے۔اس تربیت نے جدید مینوفیکچرنگ ٹیکنالوجیز، بشمول کمپیوٹر ایڈیڈ ڈیزائن (CAD)، کمپیوٹر ایڈیڈ مینوفیکچرنگ (CAM)، CNC مشین آپریشنز، اور مشین بنانے کی تکنیکوں کے لیے وسیع عملی نمائش فراہم کی۔

نیو ٹیک کے فیکلٹی اور تکنیکی ماہرین کی رہنمائی میں شرکاء نے جدید صنعتی آلات جیسے CNC ووڈ راؤٹرز، ڈرلنگ اور ٹیپنگ مشینیں، ویلڈنگ کا سامان، ایلومینیم کٹنگ مشینیں، ٹول گرائنڈرز اور شیپر مشینوں کا تجربہ حاصل کیا۔تعلیمی اور تکنیکی تربیت کے علاوہ، پرائم انسٹی ٹیوٹ آف ہیلتھ سائنسز نے اسلام آباد میں سوڈانی انجینئرز کے قیام، فلاح و بہبود اور متعلقہ معاونت کے انتظامات کی سہولت فراہم کرتے ہوئے پروگرام میں تعاون کیا اور تربیت کے پورے عرصے کے دوران ایک آرام دہ اور سازگار ماحول کو یقینی بنایا۔

پروگرام کی سفارتی اور ادارہ جاتی مصروفیات کے طور پر پروفیسر ڈاکٹر محمد اقبال چوہدری نے سوڈانی انجینئرز کے قیام کے دوران ان کے اعزاز میں ایک استقبالیہ کا اہتمام بھی کیا، جس میں کامسٹیک کے تعاون کے فریم ورک کے بنیادی مقاصد کے طور پر انسانی وسائل کی ترقی، صلاحیت کی تعمیر اور ٹیکنالوجی کی منتقلی کی اہمیت کو اجاگر کیا گیا۔یہ اقدام او آئی سی ممالک کے درمیان بین الاقوامی تکنیکی تعاون اور پیشہ ورانہ تربیت کو فروغ دینے کے لیے کامسٹیک کی وسیع تر کوششوں کا حصہ ہے جو شرکاء کو جدید ٹیکنالوجیز اور باہمی تعاون کے ساتھ سیکھنے کے ماحول سے آگاہی فراہم کرتا ہے۔تقسیم اسناد کی تقریب میں شرکت کرنے والے انجینئرز کی کامیابیوں کو باضابطہ طور پر تسلیم کیا جائے گا اور پاکستان اور سوڈان کے درمیان علمی، تکنیکی اور سفارتی تعلقات کو مزید مضبوط کیا جائے گا۔