آئی ایس ایس آئی کے انڈیا سٹڈی سینٹر کا ’’ڈیفنس اینڈ ڈپلومیسی: ایس ایم ہالی کے منتخب مضامین کا مجموعہ‘‘کے عنوان سے کتاب کی تقریب رونمائی کا انعقاد

اسلام آباد۔15جنوری (اے پی پی):انسٹیٹیوٹ آف سٹریٹجک سٹڈیز اسلام آباد (آئی ایس ایس آئی )کے انڈیا سٹڈی سینٹر نے ’’ڈیفنس اینڈ ڈپلومیسی: ایس ایم ہالی کے منتخب مضامین کا مجموعہ‘‘کے عنوان سے کتاب کی تقریب رونمائی کا انعقاد کیا۔ اس تقریب میں سابق چیئرمین، سینیٹ کی ڈیفنس اور ڈیفنس پروڈکشن کمیٹی سینیٹر نثار اے میمن نے مہمان خصوصی کے طور پر شرکت کی جبکہ سابق چیف آف ایئر سٹاف ایئر چیف مارشل (ر) سہیل امان مہمان اعزازی تھے۔

دیگر متکلمین میں کتاب کے مصنف سلطان محمود ہالی ، سابق ہائی کمشنر پاکستان ٹو آسٹریلیا سفیر نائلہ چوہان، سابق وائس چیف آف نیول سٹاف وائس ایڈمرل (ر) محمد ہارون اور کنٹری ڈائریکٹر امریکن انسٹیٹیوٹ آف پاکستان سٹڈیز ڈاکٹر عالیہ سہیل خان شامل تھیں۔کتاب میں 12 مضامین ہیں جو دفاع، سلامتی، سٹریٹجک امور پر مضامین کا ایک جامع مجموعہ پیش کرتے ہیں جو پاکستان اور وسیع تر علاقے کو درپیش ہیں۔

چیئرمین بورڈ آف گورنرز آئی ایس ایس آئی سفیر خالد محمود نے اپنے استقبالیہ کلمات میں مصنف کی قابلیت کو سراہا۔ انہوں نے کہا کہ ایس ایم ہالی ایک بہت بڑے مصنف ہیں جنہوں نے 22 سالوں میں دس ہزار سے زائد مضامین لکھے ہیں۔سینیٹر نثار اے میمن نے مہمان خصوصی کے طور پر خطاب کرتے ہوئے سلطان محمود ہالی کو ان کی 16 ویں کتاب کی اشاعت پر مبارکباد دی اور اسے ایک زندگی کی سخت اور مستقل فکری تحقیق کا نتیجہ قرار دیا۔

ڈائریکٹر انڈیا سٹڈی سینٹر ڈاکٹر خرم عباس نے اپنے خیر مقدمی کلمات میں کہا کہ آئی ایس ایس آئی ہمیشہ سکالرز کی فکر انگیز تحریروں کی حوصلہ افزائی کرتا ہے۔کتاب کے مصنف سلطان محمود ہالی نے آئی ایس ایس آئی کا شکریہ ادا کیا اور مہمانوں کا تشکر کیا۔ سفیر نائلہ چوہان نے کتاب کے بارے میں اپنے خیالات کا اظہار کرتے ہوئے اسے تجربہ، تجزیہ اور بیان کی صلاحیت کا ایک منفرد امتزاج قرار دیا۔

ڈاکٹر عالیہ سہیل خان نے کتاب کا تفصیلی علمی جائزہ پیش کیا اور اس کی اندرونی علم کی پیداوار میں شراکت کی تعریف کی۔ ایئر مارشل سہیل امان نے آئی ایس ایس آئی کی طرف سے تقریب کے بروقت انعقاد کی تعریف کی اور کتاب کو مصنف کی ملک سے محبت کا نتیجہ قرار دیا۔وائس ایڈمرل ہارون نے بھی مصنف کی شراکت کی تعریف کی اور مضامین کو فکر انگیز اور تحقیق پر مبنی قرار دیا۔