بحیرہ روم میں طوفان سے متعدد کشتیاں لاپتہ، سینکڑوں تارکین کی اموات کا خدشہ ہے، اقوام متحدہ

اقوام متحدہ۔27جنوری (اے پی پی):اقوام متحدہ کے ادارہ برائے امیگریشن نے خراب موسم کے باعث بحیرہ روم میں سینکڑوں افراد کے ڈوب کر ہلاک یا لاپتہ ہونے کے خدشات ظاہر کیے ہیں۔ اردو نیوز کے مطابق انٹرنیشنل آرگنائزیشن فار مائیگریشن نے گزشتہ روز بیان میں کہا ہے کہ حتمی اموات کی تعداد کافی زیادہ ہو سکتی ہے جس سے یہ تلخ یاددہانی ہوتی ہے۔ ادارے نے کہا کہ تیونس کے قریب ڈوبنے والی ایک کشتی میں سوار3افراد کی موت کی تصدیق ہو چکی ہے جن میں 9 سال کی دو جڑواں بہنیں بھی شامل ہیں جبکہ ان کی والدہ کو بچا لیا گیا۔ اسی واقعے میں ایک اور شخص کی بھی موت واقع ہوئی ہے۔

اسی کشتی پر سوار بچائے گئے دیگر افراد کا کہنا ہے کہ ان کے ساتھ ہی ایک اور کشتی بھی روانہ ہوئی تھی تاہم بعد میں وہ لاپتہ ہو گئی اور ابھی تک معلوم نہیں ہو سکا کہ اس کے ساتھ کیا ہوا۔ ادارے کی جانب سے اس کشتی کے بھی ڈوبنے کے خدشات ظاہر کیے گئے ہیں۔ ادارے کا کہنا ہے کہ گزشتہ 10 روز کے دوران سمندر میں شدید طوفان آئے اور یہ حتمی امکان موجود ہے کہ ایسی کافی کشتیاں طوفان کی لپیٹ میں آنے کے بعد لاپتہ ہوئیں جن پر سینکڑوں کی تعداد میں لوگ سوار تھے جبکہ خراب موسم کی وجہ سے ان کی تلاش کے کام میں بھی کافی رکاوٹیں آتی رہیں اور ان کا ابھی تک کوئی پتہ نہیں چل سکا ہے۔

ایجنسی کی جانب سے ایک اور کشتی پر سوار چند افرد کو بچائے جانے کی بھی تصدیق کی گئی ہے ان لوگوں کو مالٹا کے قریب ایک تجارتی جہاز کے عملے نے بچایا۔ اسی مقام کے حوالے سے خدشات ظاہر کیے جا رہے ہیں کہ یہاں پر 50 افراد ہلاک یا لاپتہ ہوئے ہیں۔ اسی طرح لیبیا کے علاقے توبروک کے قریب ایک کشتی ڈوبنے پر 51 افراد کی ہلاکت کا خدشہ ہے۔ آئی او ایم کے مطابق تارکین وطن کی سمگلنگ اور کشتیوں پر گنجائش سے زیادہ افراد سوار کرنا ایک مجرمانہ فعل ہے۔

بیان میں یہ بھی کہا گیا ہے کہ سمندر میں شدید طوفان کے وقت لوگوں کو روانہ کرنا اس سے بھی زیادہ قابل مذمت ہے یہ جان بوجھ کر لوگوں کو ایسی سمت میں روانہ کرنے کے مترادف ہے جہاں موت سامنے ہوتی ہے۔ ادارے کے اعداد و شمار کے مطابق 2025 کے دوران بحیرہ روم کے وسطی حصے میں ایک ہزار 340 افراد ڈوب کر ہلاک ہوئے۔ خیال رہے کہ تیسری دنیا کے ممالک سے تعلق رکھنے والے لوگ انسانی سمگلرز کی وساطت سے غیرقانونی طور پر سمندری راستے سے یورپ جانے کی کوششیں کرتے رہتے ہیں اور اکثر ایسے واقعات میں جان سے ہاتھ دھو بیٹھتے ہیں۔