چیئرمین سینیٹ سید یوسف رضا گیلانی کی کمبوڈیا کی قومی اسمبلی کی صدر سے ملاقات،کثیرالجہتی تعاون اور باہمی روابط کے فروغ کا اعادہ کیا

نوم پنہ ۔5فروری (اے پی پی):چیئرمین سینیٹ سید یوسف رضا گیلانی نے کمبوڈیا کی قومی اسمبلی کی صدر سامدیچ مہا راتسافیٹھیکا تھیپادئی خوون سوڈاری سے ملاقات کی جس دوران دونوں ملکوں کے درمیان دوستانہ اور مضبوط تعلقات کو فروغ دینے کا اعادہ کیا گیا۔ سینیٹ سیکرٹریٹ کے مطابق چیئرمین سید یوسف رضا گیلانی نے حکومت پاکستان اور عوام کی جانب سے کمبوڈیا کی قومی اسمبلی اور اس کی قیادت کے لیے نیک تمناؤں اور خیرسگالی کے جذبات کا اظہار کیا۔

انہوں نے خوون سوڈاری کو کمبوڈیا کی قومی اسمبلی کی پہلی خاتون صدر منتخب ہونے پر مبارکباد دیتے ہوئے اسے صنفی مساوات اور شمولیتی قیادت کے فروغ کا اہم سنگِ میل قرار دیا۔سید یوسف رضا گیلانی نے کمبوڈیا کی قیادت اور عوام کو سماجی و اقتصادی ترقی اور سیاسی استحکام پر مبارکباد پیش کرتے ہوئے کہا کہ پاکستان اور کمبوڈیا کے تعلقات باہمی احترام، مشترکہ مفادات اور کثیرالجہتی فورمز پر قریبی تعاون پر مبنی ہیں۔ انہوں نے علاقائی تعاون اور پارلیمانی سفارت کاری میں کمبوڈیا کے فعال کردار کو سراہا اور اقوامِ متحدہ کی سلامتی کونسل کی رکنیت (2025–26) کے لیے پاکستان کی حمایت پر شکریہ ادا کیا۔

پارلیمانی تعاون پر زور دیتے ہوئے چیئرمین سینیٹ نے پارلیمانی فرینڈشپ گروپس، ادارہ جاتی مکالمے اور بین الپارلیمانی فورمز بالخصوص ایشیائی پارلیمانی اسمبلی کے ذریعے روابط کو مزید مستحکم کرنے کے پاکستان کے عزم کا اعادہ کیا۔چیئرمین سینیٹ نے کمبوڈیا کے ساتھ اپنے ذاتی روابط کا حوالہ دیتے ہوئے ایشیا پیسفک کمبوڈیا کانفرنس 2019 میں شرکت، سابق وزیراعظم ہن سین سے ملاقاتوں، جولائی 2023 میں بطور بین الاقوامی الیکشن مبصر کمبوڈیا کے دورے اور حالیہ بین الاقوامی فورمز کے موقع پر اعلیٰ قیادت سے ملاقاتوں کو پاکستان کی جنوب مشرقی ایشیا کی جانب سٹریٹجک سفارتی رسائی کا مظہر قرار دیا۔

انہوں نے نومبر 2025 میں اسلام آباد میں منعقد ہونے والی انٹر پارلیمانی سپیکرز کانفرنس ( آئی ایس سی ) کو پارلیمانی سفارت کاری کا تاریخی اقدام قرار دیتے ہوئے کمبوڈیا کی شرکت اور آئندہ اس کانفرنس کی میزبانی میں دلچسپی پر اظہارِ قدردانی کیا۔ملاقات میں فریقین نے تجارت، سرمایہ کاری، ماحولیاتی تبدیلی سے نمٹنے، دفاعی مکالمے، عوامی روابط اور ثقافتی سفارت کاری کے شعبوں میں تعاون بڑھانے پر اتفاق کیا، پاکستان کی گندھارا تہذیب میں موجود بدھ مت ورثے کو بھی ثقافتی روابط کا اہم ذریعہ قرار دیا گیا۔

چیئرمین سینیٹ نے کمبوڈیا کے ساتھ دوطرفہ تعلقات کو مزید گہرا کرنے کے پاکستان کے پختہ عزم کا اعادہ کرتے ہوئے اعلیٰ سطحی پارلیمانی روابط کے تسلسل کو امن، رابطہ سازی اور جامع ترقی کے فروغ کے لیے ناگزیر قرار دیا۔اس موقع پر چیئرمین سینیٹ کے ہمراہ سینیٹر ڈاکٹر زرقا سہروردی تیمور، سینیٹر عابد شیر علی، سینیٹر ضمیر حسین گھمرو اور چیئرمین سینیٹ کے مشیر و انٹر پارلیمانی اسپیکرز کانفرنس کے سفیر مصباح کھر بھی موجود تھے