ازبک صدر شوکت مرزایوف کا دورہ پاکستان ، دونوں ممالک کے درمیان دوطرفہ تعلقات میں بڑی پیش رفت کا آغاز ، متعدد شعبوں میں 28 معاہدوں اور مفاہمتی یادداشتوں پر دستخط

اسلام آباد۔8فروری (اے پی پی):ازبکستان کے صدر شوکت مرزایوف کے پاکستان کے دورہ نے دونوں ممالک کے درمیان دوطرفہ تعلقات میں ایک بڑی پیش رفت کا آغاز کیا ہے اور دونوں ممالک میں متعدد شعبوں میں 28 معاہدوں اور مفاہمت کی یادداشتوں پر دستخط ہوئے ہیں، سالانہ تجارتی حجم کو 2 ارب ڈالر تک بڑھانے کا ہدف مقرر کیا گیا ہے۔رپورٹ کے مطابق یہ دورہ عالمی تجارتی راستوں میں تبدیلیوں اور توانائی اور خوراک کی سلامتی کے بڑھتے ہوئے خدشات کے تناظر میں ہوا، جس نے اسلام آباد اور تاشقند کے درمیان معاشی تعاون کو گہرا کرنے اور وسطی ایشیا اور جنوبی ایشیا کے درمیان علاقائی رابطہ کاری کو بہتر بنانے کے مشترکہ عزم کو اجاگر کیا۔

وزیراعظم شہباز شریف اور ازبک صدر شوکت مرزایوف نے ایک مشترکہ اعلامیہ پر دستخط کیے جس میں مضبوط اسٹریٹجک شراکت داری کے عزم کی تصدیق کی گئی۔انہوں نے اگلے پانچ سالوں میں دوطرفہ تجارت کو 2 ارب ڈالر تک بڑھانے کے لیے ایک کلیدی معاہدہ بھی مکمل کیا۔ دستخط شدہ دستاویزات میں خارجہ امور، ترجیحی تجارت، دفاع، موسمیاتی تبدیلی، زراعت، خوراک کی سلامتی، انفارمیشن ٹیکنالوجی، سائنس، تعلیم، ثقافت، بحری امور، ادویات، ٹیکسٹائل، کان کنی، جیوسائنسز، چھوٹے اور درمیانے درجے کے کاروبار، کھیل اور منشیات کے خلاف کارروائی کے شعبوں میں تعاون شامل ہے۔

اہم نتائج میں سے ایک ترجیحی تجارتی معاہدے کے تحت اشیاء کی فہرست کو وسعت دینے کا پروٹوکول شامل ہے، ساتھ ہی پاکستان-ازبکستان بین العلاقائی فورم قائم کرنے کا فیصلہ کاروباری تعاون کو فروغ دے گا۔ دونوں فریقوں نے خارجہ وزارتوں کے درمیان تجارت کی سہولت کاری کو فروغ دینے کے لیےایک مفاہمت کی یادداشت اور دفاعی تعاون کے لیے ایک ایکشن پلان بھی دستخط کیا۔ دونوں ممالک نے بحری تعاون پر مفاہمت کی ایک یادداشت پر دستخط کیے، جس میں کراچی، گوادر اور پورٹ قاسم پر ترجیحی بندرگاہ کے انتظامات شامل ہیں، جس سے ازبکستان کو سمندری راستوں تک بہتر رسائی ملے گی۔ صنعتی تعاون، ادویات، ٹیکسٹائل اور چھوٹے اور درمیانے درجے کے کاروباروں کی حمایت میں بھی معاہدے ہوئے۔

توانائی اور ماحولیاتی شعبوں میں دونوں فریقوں نے ماحولیات، موسمیاتی تبدیلی کے موافقت اور قدرتی آفات کے خطرات میں کمی کے معاہدوں پر دستخط کیے، جو پائیدار ترقی اور غیر روایتی سلامتی کے چیلنجوں پر ان کے مشترکہ توجہ کی عکاسی کرتے ہیں۔ زرعی تحقیق، پودوں کی حفاظت، غذائی تحفظ ، انفارمیشن ٹیکنالوجی، سائنس اور تعلیم، ثقافتی ورثے کی حفاظت اور کھیلوں کے تعاون پر بھی مفاہمت کی یادداشتوں پر دستخط کئے گئے۔ منشیات کی غیر قانونی اسمگلنگ کے خلاف ایک معاہدہ اور سزا یافتہ قیدیوں کے تبادلے پر بھی اتفاق ہوا۔دورے نے علاقائی رابطہ کاری کی اسٹریٹجک اہمیت کو اجاگر کیا، خاص طور پر تجویز کردہ ٹرانس افغان ٹرانسپورٹ کوریڈورز کے ذریعے، جنہیں دونوں فریق وسطی ایشیا اور بحیرہ عرب کے درمیان لاجسٹک لاگت کم کرنے، ترسیل کے اوقات مختصر کرنے اور تجارتی صلاحیت کو کھولنے کے لیے ضروری سمجھتے ہیں۔

نیشنل یونیورسٹی آف سائنسز اینڈ ٹیکنالوجی (این یو ایس ٹی) نے وزیراعظم ہاؤس میں منعقدہ ایک خصوصی تقریب میں صدر مرزایوف کو ڈاکٹریٹ آف فلاسفی کی اعزازی ڈگری اور پروفیسری کا خطاب عطا کیا۔وزیراعظم شہباز شریف اور این یو ایس ٹی کے ریکٹر ڈاکٹر محمد زاہد لطیف نے ازبک لیڈر کی دوطرفہ تعلقات کو مضبوط کرنے اور خطے میں امن، ترقی، تعلیم اور جدت کو فروغ دینے میں خدمات کے اعتراف میں یہ اعزاز پیش کیے۔صدر شوکت مرزایوف نے پاکستان کو قریبی دوست اور قابل اعتماد شراکت دار قرار دیا جبکہ وزیراعظم شہباز شریف نے کہا کہ یہ معاہدے دونوں فریقوں کی سیاسی خواہش کی عکاسی کرتے ہیں کہ ایک مستحکم، مربوط اور خوشحال خطہ تعمیر کیا جائے۔28 معاہدوں پر دستخط، تجارت کا بلند ہدف اور علامتی اعزازات نے مل کر پاکستان-ازبکستان تعلقات میں ایک نئے مرحلے کا آغاز کیا جو رابطہ کاری، معاشی تعاون اور مشترکہ ترقی کے اہداف پر مبنی ہے۔