یومِ پاکستان بانیانِ پاکستان کے وژن، عزم اور قربانیوں کی یاد کا دن ہے، ڈاکٹر خالد مقبول صدیقی

اسلام آباد۔23مارچ (اے پی پی):وفاقی وزیرِ تعلیم و پیشہ ورانہ تربیت ڈاکٹر خالد مقبول صدیقی نے یومِ پاکستان کے موقع پر اپنے پیغام میں کہا ہے کہ یومِ پاکستان بانیانِ پاکستان کے وژن، عزم اور قربانیوں کی یاد کا دن ہے،ہمیں انصاف، مساوات اور مواقع پر مبنی ریاست کے قیام کے عہد کی تجدید کرنا ہوگی ۔وزارت وفاقی تعلیم و پیشہ وارانہ تربیت کی جانب سے جاری بیان میں وفاقی وزیر ڈاکٹر خالد مقبول صدیقی نے کہا کہ یومِ پاکستان 23 مارچ 1940 کی قراردادِ لاہور کی یاد دلاتا ہے جس نے قیامِ پاکستان کی بنیاد رکھی، یومِ پاکستان بانیانِ پاکستان کے وژن، عزم اور قربانیوں کی یاد کا دن ہے۔ وفاقی وزیرِ تعلیم نے کہا کہ ہمیں انصاف، مساوات اور مواقع پر مبنی ریاست کے قیام کے عہد کی تجدید کرنا ہوگی۔

ڈاکٹر خالد مقبول صدیقی نے مزید کہا کہ مضبوط اور خوشحال پاکستان کے لیے اجتماعی کاوشیں ناگزیر ہیں۔ انہوں نے کہا کہ تعلیم ،قومی ترقی اور روشن مستقبل کے حصول کا بنیادی ستون ہے، ہر بچے کو معیاری تعلیم کی فراہمی حکومت کی اولین ترجیح ہے۔ وفاقی وزیر نے کہا کہ نوجوان نسل کو علم و مہارت سے آراستہ کرنا وقت کی اہم ضرورت ہے، ملک بھر میں معیاری اور مساوی تعلیم کے فروغ کے لیے بھرپور اقدامات جاری ہیں۔ وفاقی وزیرِ تعلیم و پیشہ ورانہ تربیت ڈاکٹر خالد مقبول صدیقی نے کہا کہ آئین آج یومِ پاکستان پر اتحاد، ایمان اور نظم و ضبط کے اصولوں پر عمل کا عہد کریں۔ ڈاکٹر خالد مقبول صدیقی نے کہا کہ پاکستان کی ترقی اور استحکام کے لیے مل کر کام کرنا ہوگا، پاکستان پائندہ باد۔