تیئس مارچ بانیانِ پاکستان کے وژن، عزم اور قربانیوں کی یاد کا دن ہے،وفاقی وزیر شزا فاطمہ خواجہ کا یومِ پاکستان پر پیغام

اسلام آباد۔23مارچ (اے پی پی):وفاقی وزیر برائے انفارمیشن ٹیکنالوجی و ٹیلی کمیونیکیشن شزا فاطمہ خواجہ نے یومِ پاکستان پر اپنے پیغام میں کہا ہے کہ تیئس مارچ بانیانِ پاکستان کے وژن، عزم اور قربانیوں کی یاد کا دن ہے، ڈیجیٹل ترقی قومی ترقی اور روشن مستقبل کے حصول کا بنیادی ستون ہے۔وزارتِ انفارمیشن ٹیکنالوجی وٹیلی کام کی جانب سے جاری بیان میں کہا گیا ہے کہ یومِ پاکستان 23 مارچ 1940 کی قراردادِ لاہور کی یاد دلاتا ہے جس نے قیامِ پاکستان کی بنیاد رکھی۔

وفاقی وزیر نے کہا کہ مضبوط اور خوشحال پاکستان کے لیے اجتماعی کاوشیں ناگزیر ہیں۔ انہوں نے کہا کہ ڈیجیٹل ترقی قومی ترقی اور روشن مستقبل کے حصول کا بنیادی ستون ہے، ہر شہری کو جدید ٹیکنالوجی تک رسائی فراہم کرنا حکومت کی اولین ترجیح ہے۔ وفاقی وزیر نے کہا کہ نوجوان نسل کو ڈیجیٹل مہارتوں سے آراستہ کرنا وقت کی اہم ضرورت ہے، ملک بھر میں ڈیجیٹلائزیشن اور مساوی ٹیکنالوجی کے فروغ کے لیے بھرپور اقدامات جاری ہیں۔وفاقی وزیرِ انفارمیشن ٹیکنالوجی و ٹیلی کمیونیکیشن شزا فاطمہ خواجہ نے اپنے پیغام کے آخر میں کہا کہ پاکستان ہمیشہ زندآباد۔