ایف آئی اے،امیگریشن نے جعلی دستاویزات پر بیرون ملک سفر کرنے والے مسافر کو اسلام آباد انٹرنیشنل ایئرپورٹ سے گرفتار کر لیا

اسلام آباد۔4مئی (اے پی پی):وفاقی تحقیقاتی ادارہ (ایف آئی اے) امیگریشن نے جعلی دستاویزات پر بیرون ملک سفر کی کوشش ناکام بنا کر ایک مسافر کو اسلام آباد انٹرنیشنل ایئرپورٹ سے گرفتار کر لیا۔ایک اہلکار نے پیر کو اے پی پی کو بتایا کہ مسافر جس کی شناخت محمد شفیق کے نام سے ہوئی، 2 مئی 2026 کو امارات کی پرواز ای کے-615 کے ذریعے یونان جا رہا تھا کہ امیگریشن کلیئرنس کے دوران اسے روک لیا گیا۔انہوں نے بتایا کہ مشتبہ شخص کی ایئرلائن کے عملے نے نشاندہی کی جس پر اس کے سفری دستاویزات کی تفصیلی جانچ پڑتال کی گئی۔

اہلکار کے مطابق چھان بین کے دوران اس کے قبضے سے برآمد ہونے والا یونانی رہائشی کارڈ جعلی پایا گیا جس کے بعد اسے حراست میں لے لیا گیا۔انہوں نے بتایا کہ ملزم کو مزید قانونی کارروائی کے لیے ایف آئی اے کے انسداد انسانی سمگلنگ سرکل اسلام آباد کے حوالے کر دیا گیا ہے۔اہلکار نے کہا کہ ایف آئی اے انسانی سمگلنگ اور جعلی دستاویزات کے استعمال کے خلاف زیرو ٹالرنس پالیسی کے تحت کارروائیاں جاری رکھے ہوئے ہے، اور اس میں ملوث افراد کے خلاف سخت قانونی کارروائی کی جائے گی۔