خیبرپختونخوا حکومت کی جانب سے قلم چھوڑ ہڑتال کا اعلان ’’ٹوپی ڈرامہ‘‘ہے، انجینئر امیر مقام

اسلام آباد۔5مئی (اے پی پی):خیبرپختونخوا حکومت کی جانب سے قلم چھوڑ ہڑتال کے اعلان پر وفاقی وزیر اور صدر پاکستان مسلم لیگ (ن)خیبر پختونخوا انجینئر امیر مقام نے سخت ردعمل دیتے ہوئے اسے ’’ٹوپی ڈرامہ‘‘ قرار دے دیا۔اپنے بیان میں انہوں نے کہا کہ یہ اقدام عوام کی توجہ اصل مسائل سے ہٹانے کی ناکام کوشش ہے۔ انہوں نے کہا کہ صوبائی حکومت اپنی ناقص کارکردگی چھپانے کے لئے محض پوائنٹ سکورنگ میں مصروف ہے جبکہ عوام کو بنیادی سہولیات سے محروم رکھا جا رہا ہے۔

انہوں نے کہا کہ باشعور عوام ایسے ہتھکنڈوں کو مسترد کریں گے۔انجینئر امیر مقام نے سوال اٹھایا کہ کیا ایک وزیر اعلیٰ صوبے کے معاملات پر توجہ دینے کی بجائے ہڑتالوں کی سیاست کرے گا؟ خیبرپختونخوا کے عوام اس غیر ذمہ دارانہ رویے سے تنگ آ چکے ہیں، صوبہ پہلے ہی سرکاری امور میں تعطل کا شکار ہے اور مختلف شعبوں میں قلم چھوڑ ہڑتال جاری ہیں جس کا براہِ راست نقصان عام شہریوں کو اٹھانا پڑ رہا ہے۔

انہوں نے این ایف سی کے حوالے سے بھی وضاحت کرتے ہوئے کہا کہ صوبے کو اس کا آئینی حصہ مل رہا ہے، اس کے باوجود عوام کو گمراہ کرنے کی کوشش کی جا رہی ہے جبکہ بجلی اور گیس کے معاملات کو سیاسی رنگ دیا جا رہا ہے۔

بیان میں مزید کہا گیا کہ جب پوری قوم معرکہ حق کی پہلی سالگرہ منا رہی ہے اور وزیرِاعظم محمد شہباز شریف کی قیادت میں وفاقی حکومت نے نمایاں کامیابیاں حاصل کی ہیں اور فیلڈ مارشل سید عاصم منیر کی قیادت میں ملک کا دفاع مضبوط ہاتھوں میں ہے تو کچھ عناصر کو ملک کی مثبت پیشرفت ہضم نہیں ہو رہی۔

انہوں نے کہا کہ یہ وہی لوگ ہیں جو ہر قومی کامیابی کو متنازعہ بنانے کی کوشش کرتے ہیں مگر ماضی کی طرح اس بار بھی ناکام ہوں گے، عوام اب باشعور ہیں اور ترقی، استحکام اور حقیقی کارکردگی کو ترجیح دیتے ہیں۔