چین کا شہری ترقی کا تجربہ ترقی پذیر ممالک کے لیے قابلِ قدر مثال ہے ، اقوام متحدہ

باکو ۔22مئی (اے پی پی):اقوام متحدہ کے انسانی آبادکاری پروگرام (یو این ہیبی ٹاٹ) کی ایگزیکٹو ڈائریکٹر اناکلاڈیا راسباخ نے کہا ہے کہ چین کا سبز، جامع اور اسمارٹ شہری ترقی کا تجربہ عالمی جنوب (Global South) کے ممالک کے لیے اہم سبق فراہم کرتا ہے ۔ شنہوا کے مطابق انہوں نے آذربائیجان کے شہر باکو میں منعقدہ 13ویں ورلڈ اربن فورم کے ایک نیٹ ورکنگ ایونٹ سے خطاب کرتے ہوئے کہا کہ دنیا بھر میں تیزی سے بڑھتے شہری چیلنجز کے حل کے لیے چین کا ماڈل قابلِ توجہ ہے۔ اناکلاڈیا راسباخ کے مطابق چین نے شہری ترقی میں عوامی مرکزیت، ماحولیاتی بہتری اور ڈیجیٹل ٹیکنالوجی کے مؤثر استعمال کے ذریعے نمایاں پیش رفت کی ہے، جس میں سبز توانائی اور قدرتی وسائل کے بہتر استعمال جیسے اقدامات شامل ہیں ۔ انہوں نے اپنے دورۂ چین کا ذکر کرتے ہوئے کہا کہ بیجنگ، شنگھائی اور ویہائی جیسے شہر ماحول دوست اور جدید شہری منصوبہ بندی کی بہترین مثال ہیں، جہاں معیارِ زندگی بہتر بنانے کے لیے مسلسل اقدامات کیے جا رہے ہیں۔اجلاس میں یہ بھی اعلان کیا گیا کہ 2026 میں عالمی یومِ شہروں کی مرکزی تقریب چین کے شہر فوزو میں، عالمی صفائی دن کی تقریب شاؤشنگ میں، جبکہ پائیدار ترقیاتی اہداف (SDG) سے متعلق عالمی کانفرنس شنگھائی میں منعقد ہوگی۔یو این ہیبی ٹاٹ کی سربراہ نے مزید کہا کہ ورلڈ سٹیز ڈے اور ورلڈ کلین اپ ڈے جیسے عالمی پلیٹ فارم شہروں کے درمیان تعاون، تجربات کے تبادلے اور مشترکہ سیکھنے کے اہم ذرائع ہیں۔